مذكرات ويوميات جامعية (8)

بسم الله الرحمن الرحيم,

Term 152: ترم عبدالله الجديد. 

اهلااااااااااااااااااا وسسسسسسسسهلا!! 
رجججججعنا مررررره ثانية بحمد الله ومنته وفضله وكرمه.

سمستر احداثه جدا جدا جدا كثيرة ومؤثرة فيني وفي شخصيتي وفي حياتي الجامعية عن بكرة ابيها! سمستر فعلا غير عن كل السمسترات, غير عن كل اللحظات اللي عشتها في الجامعة, غير حياتي, اسلوبي, رجع اهتماماتي القديمة, رجع عبدالله 2010-2013, رجعت حياتي, رجعت روحي فعلاً! قسوة دراسية مالها مثيل! معلمين ودكاترة جدد كسبتهم و كسبت صداقتهم واحمد الله اني سجلت عندهم! ما ادري وش اقول وش اخلي عسى ربي يساعدني اتذكر كل شيء, سمستر بكل اختصار اقدر اسميه سمستر عبدالله الجديد!

في هذا الترم او السمستر او سمه زي ماتبي, تعلمت كيف اصارع واقاتل لحالي! انصدمت كثير وحزنت كثير وفي نفس الوقت فرحت كثييييير! شيء دايم يصير لكن هالمره فعلا غير!

خلوني ابدا بالعلاقات الاجتماعية, لازالت وستدوم علاقتي مع صديقي وحبيبي ابو العز اللي سبق وذكرته في حلقة ماضية ولله الحمد, في الحقيقة تعززت هذي العلاقه بشكل مرضي للطرفين وهو بالفعل "صديق". 

وهنا احب اوقف واقول من خلاصة تجارب كثيرة, تبي علاقتك مع اي انسان تدوم؟ 1) خلك صريح معه. 2) انصحه. 3) حب له الخير مثل ماتحب لنفسك. 4) ان شفته متضايق رح له وامسك يده وطلعه من اللي هو فيه! 5) لا تكذب عليه. 6) لا تتمصلح معه. 7) حسسه بالاخوه. 

ومن ناحية الروميت فهاذي قصة جديدة: في بداية السمستر كنت مقرر اسكن لحالي لاني مو مرتاح في حياتي (ركز ماقلت مو مرتاح مع روميتي) بمعنى ان وضعي مو عاجبني, ازعاج منبهات قروشلي حياتي, برودة المكيف سببت لي مرض في عظامي بالموت خف وراح مني! هذا مايهم! في يوم من الايام كلمني احد الاصدقاء وقال لي لازم تسكن مع روميتي الحالي (روميته هو) لسبب معين, الشخص اللي سكنت معه هذا انسان جدا رائع ولما اقول رائع يعني رائع.

على الجانب الاخر من الاكتشافات, اكتشفت ان ثلاث ارباع دفعة تخصصي مبزره مع كل اسف, مواقف كثير اثبتت لي هالشيء, قررت اعزل نفسي عنهم تماماً الا كم شخص قررت امشي بهالرحله لحالي ومع اللي يعزني ويقدرني وبمعنى اصح "الرجال فقط". 

خلوني اعطيكم مثال على شيء صار معي بهالسمستر وانتم احكموا "مثال واحد من مليون": كان عندنا اختبار في مادة من المواد, يدرسها احد الدكاتره "المحترمين", "الفاهمين", "اللي يستاهلون دكتوراه", والاخ الكريم هذا يكرر الاسئلة كل سمستر, واحد "محترم", "مسلم", "خلوق" من قروب دفعتنا "المحترم", اخذ اختبار قديم وغير فيه لاسئلة مختلفه وحطه في مكان ما! وجينا انا وعدد لا بأس فيه وحملنا هالاختبار وذاكرناه, دخلنا الفاينل لقينا كل الاسئلة غير! , سلامات!!!! عموما قلت: "يالله يارجال خيره ودامه غير الاسئلة معناته الكل مخبط والافرج نازل" طلعت من الاختبار وانا مصدوم و "راضي" وحط سبعمية خط تحت "راضي" لاني استاهل "ماذاكرت" وليش ماذاكرت؟ بتعرف السبب مع استعراضي للمواد والخطأ الجسيم اللي سويته في تنزيل المواد. المهم, طلعت واشوف صديق عزيز قدامي واسأله: "يولد وش ذا ليش يغير الاسئلة!!!" قال لي: "تستهبل انت؟ ماغير شيء الاختبار هو نفسه اللي عندنا" قلت: "هههههههههههههههه تستعبط انت؟" قال: "والله ماستعبط" ووراني الاختبار وانا منصدم, فتحت الاختبار اللي عندي واكتشف انه ملفق ومحطوط في المكان اللي محطوط فيه قبل كم يوم من الاختبار ! شرايكم بالله؟ عموما حليت بفهمي وطلعت بقريد حلو والحمد لله على كل حال (كان مفروض اعلى). المهم, رحت عند واحد كان يذاكر معنا نفس الاختبار اللي عندنا وقلت له: "شفت وش مسويين فينا؟ ملفقين لنا اختبار" قال: "اه ياولاد الوسخه!!!!", جات النتايج وابو "ولاد الوسخه" جايب 90 واموره طيبه واكتشفنا انه يدري ان الاختبار اللي عندنا مضروب ولا علمنا.





نستعرض المواد مادة مادة؟ يالله. 




CE202: هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههه! 
MATH202:

مع البروفيسور القدير المحترم, نصر الدين تاتار! وش اقول وش اخلي يادكتور نصر! قمة في الاحترام والاخلاق والشرح الرهيب عمري في حياتي مافهمت ماث في هالجامعة زي الناس لكن مع هالدكتور سبحان الله بس! اجيك مواصل وتعبان مثلاً؟ والله اركز وفاهم معاه واحل وكل شيء عال العال, اشتهر بمقولة: "We don't grade what's in your mind, we grade what's written on papers" لانه يقول ان الطلاب اذا جا وقت المراجعه يقعدون يقولون له والله انا كنت اقصد كذا وكذا ! ميجر 1 كان جدا رهيب وميجر 2 كان ارهب والفاينل احسن منهم كلهم وسلامة فهمك  الحمد لله.

PETE204:

مادة تخصص اسمها: Petroleum Rock Properties, خواص الصخور, مادة من المفترض انها تكون "مهمه" ومن المفترض انها تكون "ممتعه" لكن "الرجال" اللي كان يدرسنا عفس ام الدعوه الله يهديه! مهايطي درجة اولى اشتهر بعبارة "Google my name" والكثير من عبارات الهياط الاخرى, يعلم الله قد ايش اشتغلت على الكورس برى الكلاس عشان افهم, اما مدرس اللاب ههههههههههههههههههههههههههههه خياس الله وكيلكم انسان عنجهي قليل ادب بشكل ماتتصورون! يصحح الريبورتات على كيفه مره يعطيني 100 ومره يقول 0 عيده, عطاني مره 0 قال عيده, رحت له قلت له: "يا استاذي المحترم: بالله تعال علمني ليش صفر؟" تتوقعون وش قال؟ قال:" انتا مش كاتب الاكوبمنت" بعد ماصححه مره ثانيه ومشينا على الفورم الرسمي عطاني 90! ههههههههههههههههههه ياهوووووووووه شغل صماخك!!!!! ميجر 1 و 2 والفاينل ممتازين وطلعت بقريد ابو "سلامة فهمك"  والحمد لله مادة تخصص والقريد فيها يفرح اذا جاك ممتاز. صار لي موقف مع اخ العرب هذا بعد ميجر 2 رحت له المكتب عندي اعتراض على سؤال انا حاله صح ومتاكد, طبعا نظامه هو نسخ لصق من السلايدات يعني حفظ بالعربي, وانا مسوي كوبي بيست للحل من السلايدات لورقة الاختبار, رحت له قام يطالع في الورقه وفتح السلايدات عنده وحلس يشيك كلمة كلمة وانحشر ربع ساعه كامله يحاول يطلع خطأ في النهاية تدرون وش قال؟ قال: " اصلا لو اعد كلمات حلك ماراح تكون نفس عدد كلمات السلايدات!!!!!!!!!!!!" ههههههههههههههههههههههههههههههههه كفففففففففّ!!!!! عيييييب عليك دكتور طول بعرض تقول هالكلام وربي عييب!, قبل ما اطلع قال لي, ترى انا من خمس مدري عشر سنوات ماعمر اي طالب اخذ مني ولا بوينت زياده في المكتب! ابتسمت وطلعت. على سبيل الفرح, الرجال راح كندا خلاص.


PETE205:

اااااه ياخواص السوائل! كانت شبح السمستر! ميجر 1 تحت الافرج وميجر 2 على الافرج والفاينل بدعت طلعت بقريد ججججامد! لا تسالني كيف!
مادة استمتعت فيها بكل كونسبت كانت تقدمه وكانت اختبارات الدكتور جدا جدا جدا جدا جدا جدا جدا صعبه! والحمد لله عدت. الجدير بالذكر انها كانت اوبن بوك اوبن نوت اوبن زفت اوبن كل شيء واتحداك تحل.

IAS201:

ياحبيبي يادكتور هالماده! عربي, المقرر الثاني! سبب جدا قوي لاستعادتي لثقتي بنفسي في اخر لحظات السمستر!

شفتو هالكلاس؟ 



قدمت فيه برزنتيشن وانا مواصل وتعبان وفي شعبه غير شعبتي لكن مع كل هذا؟ كان افضل برزنتيشن لي اقدمه في حياتي وتصفيق وتعليقات وردود الدكتور والطلاب خلتني اطير في السماء! كنت في ذاك البرزنتيشن والكلاس اكلم نفسي قبل ما اكلم الجمهور, افرحتني يا 113!!!!!!!!!!

احب اختصر كل الكورس في رسالة واتس اب من الدكتور نفسه: 



STAT319:

الارواح جنود مجنده ماتعارف منها ائتلف وما تناكر منها اختلف.
اتذكر كان يجيني مغص في كلاسه من كثر ماهو غثيث!

واحب اكتفي بهالاقتباس:

إلى قسم الإحصاء والرياضيات الموقر:
كان ولا يزال بإمكانكم تسهيل الأسئلة على الطلاب بحيث تكون سهلة في متناول الجميع. كان بإمكانكم جعل المادة ممتعة وشيقة بدلا أن تكون ثقيلة ومرعبة. اتسائل في بعض الأحيان لماذا هذا التعقيد والتصعيب على طلاب الهندسة رغم أنهم لن ولم يستفيدوا من هذه المادة. أنا مثلا طالب في الهندسة الكيميائية درست هذه المادة في فصل 111 والآن أنا في فصل 131 يعني بعد سنتين من أخذ مادتكم المصونه والله ثم والله لم استفيد منها شي في تخصصي مجرد زيادة عدد وليتها من المواد السهلة الممتعة اللي نقدر نرفع فيها المعدل بل كانت العكس تماما. بصراحة مقهور على تنزيل معدلي بمادة سخيفة مثل هذه المادة ولكن مافي اليد حيلة.

إلى قسم الهندسة الكيميائية الموقر:
بما انني درست كل كورسات الهندسة الكيميائية المطلوبة للتخرج لم أرى هناك أي علاقة ولو كانت بسيطة بين مواد التخصص وبين مادة الإحصاء. فلماذا ندرس مادة مالها فايدة في التخصص لماذا لا تبدل بمادة اخرى أكثر فائدة وأقل تعقيدا منها.

هذي المادة اللي كانت مصيبة السمستر (مو قريد) اقصد ضغط زايد, لاني ماتوقعت ال 205 بتكون بهالصعوبه! باختصار هالماده ماكان مفروض انزلها لكن من الجانب الايجابي افتكيت منها.



حدث مهم صار في فترة بعد ميجر 2: في يوم من الايام صحيت من النوم, روقت, تقهويت, انسدحت على السرير سوي وطقطقت على الجوال, اكتشفت ان عندي صديق مهمله في الغرفه, صديق قديم جدا, صديق الطفوله! صديق عمره ماخان ولا غدر! صديق اكتشفت انه من القلائل اللي يستحقون الوفاء, سامحني ياصديقي تركتك وهجرتك كثير, الوقت اللي قضيته مع ناس فعلا فعلا ماتستاهل كان مفروض اقضيه معك! والله مفروض اقضيه معك! كنت كل يوم اتعرف معك على ناس بمعنى الكلمه "رجال", كنت الونيس في وقت ماكون طفشان او زعلان, كنت اللي تداوي الجروح ولا تطلب مقابل! كل اللي كنت تبيه مني اني اصرف عليك واخليك شغال بس! واحطك في مكان بارد مو حار! وهذي بالمناسبة من ابسط حقوقك, يسمونك يالاسود! لكن هالعنصريه فعلا امقتها ولا احبها!, تبون تعرفون مين؟ دقيقه بس, المهم بعد ماقمت من السرير التفت براسي يمين وطاحت عيني على التلفيزيون حقي, والتفت يسار وتطيح عيني على الثلاجه, والتفت شوي زيادة يسار وتطيح عيني على البلايستيشن (الاسود), نعم نعم هذا هو الصديق الاسود العزيز الحبيب! صديق الطفوله والشباب والثانوية والمتوسطه وكل شيء! المهم جلست اناظر فيه واقول له تفكر في اللي افكر فيه؟ قال: "قدام ياشنب!!!" واقوم واشيل التلفيزيون واحطه فوق الثلاجه اللي جنب المكتب واخليها مقابله كرسي المكتب (الشرح بنقالي لكن بوريكم صوره), طلعت محل بلايستيشن واخذت لي لعبه اسمها The division! كانت امتع لعبه لعبتها فعلا مع شباب تعرفت عليهم اثناء لعبي لها! وبكذا صار نظامي لعب, مذاكرة, لعب, مذاكرة, لعب, مذاكرة والنتايج كانت جدا جدا جدا جدا جدا جدا جدا رهيبه!!! سواء دراسياً او اجتماعياً, النفاق في حياتي قل من بعض الشخصيات النفسيه! بسبب اني طبعا قلت مقابلاتي معهم! بالعربي صرت اسير البلايستيشن مره اخرى في حياتي (كما هي العاده من زمن). 

هذا كان من اهم الاحداث والقرارات اللي اتخذتها في هالسمستر! ومبسوط وماندمت عليها ابدا!!

هذي صورة القرار:


شكراً لقراري وشكرا لك ايها الاسود على التعزيز كنت خير صديق!

الحدث الثاني: في فترة الاختبارات النهائية وتحديدا بعد نهاية الاختبار القبل الاخير (يعني كان باقي عندي فاينل وهو فاينل 205), رجعت الغرفه بعد الفاينل القبل الاخير هذا وانا منهار نفسيا وجسديا وعقليا وصحيا! اطالع في غرفتي وفي نفسي وافكر واقول وش اسوي انا هنا! يالله ياكريم عفوك ورحمتك (هذا كله ناتج عن الضغط الرهيب اللي واجهته هالسمستر واللي خلاني فوق كل هذا عصبي بشكل جدا مقرف (الى الان مستمره العصبيه), مع الاسف), اتصل علي صاحبي احمد وقال لي: "عبدالله وينك؟ تتعشى" قلت له: "اوك بس تعال الغرفه ونطلع سوا" جاني واول مادخل رفعت راسي وقلت له احمد انا بشيل اغراضي كللللللها وبسافر!!!!!! قال لي: "تستعبط انت اختبار ال 205 قريب مره وش اللي بشيل اغراضي وبسافر؟؟" قلت له: "بروح عند اهلي وباذن الله ببدع بالاختبار" قال: "براحتك" قلت له:"وين رايح؟ ابيك تشيل معي الاغراض ونطلع الديره سيارتين" قال: "ابشر" قلت له: "get me out of here"! ووجهي فعلا تعبان! فعلا طلعنا وشلت اغراضي واثاثي كله, اثناء نقلي للاغراض من الغرفه للمواقف صادفت ابو العز مار ووقف سلم علي وعلى اللي معي ومتأكد انه لاحظ قد ايش كنت محتاج اطلع واغير المكان.



ياصاحبي ضاقت بي الدنيا وانا صدري وسيع .. ولاشــك عـنـد الله فـرجـهـا لـوتـصـك ابـوابـهـا
وبغـيـت ادلــه خـاطـري والـهـم عـيـا لا يطـيـع .. وهمـوم قلبـي نوخـت بيـن الضـلـوع اركابـهـا 

ماقصر ساعدني بشيلة الاغراض ورحت عند اهلي ورتبت غرفتي الخاصه واليوم اللي بعده بديت مذاكرة 205 وكانت النتايج جدا جدا جدا رائعة ومبهره وقلت ياليتني مسويها من زمان وطالع من ذاك السجن النفسي! 

ملاحظة بخصوص الحدث الثاني: المشكله مو في سكن جامعة الملك فهد! ولا اكتئاب ولا شيء! المشكله هو انه جاني تشبع ورفض وشوق في نفس الوقت للواقع اللي كنت فيه والشوق هو شوق لحياتي القديمه اللي رجعت لها بفضل الله, واللي يتسائل ويقول بترجع لسكن الجامعه؟ اقول: maybe one day! لكن الان مرتاح ويمكن اسافر كل يوم رايح جاي للجامعة وقت الدوام ويمكن لا! يعتمد على الوضع بعدين. لكن حاليا مافيه رجعه لو ايش!!

بالنسبة للمعدل: ماتغير ابداً لا ارتفاع ولا نزول. 

المبدأ الوحيد الجديد هو:
1. جميع المبادئ اللي في الحلقات الماضيه صحيحة واصبحت نظريات لا فرضيات!

الشيء الجديد الان هو: 

عززت رغبتي في العوده لعالم الالعاب والبلايستيشن وفتحت قناة باليوتيوب مختصه بحياتي الشخصية بشكل عام وحياتي التقنية بشكل خاص!

Cancel-09 | Gaming Channel |https://m.youtube.com/channel/UCWEF0VVAsCne5wrFaaNKkIw?

Like | Subscribe | Share ♡ .

القناة مشوارها جدا طويل وبتكون باذن الله لها مكانه جدا عاليه في عالم الالعاب والتقنية ان قالها الله عز وجل. 


مستقبل المدونة والقادم: انا باذن الله ماراح اكون متواجد في الجامعه في ترم 161 وبكون في جامعة كولورادو في الولايات المتحدة الامريكية, اسأل الله التوفيق والتيسير وباذن الله يومياتي بتكون على قناة اليوتيوب حقتي اللي حطيت رابطها فوق, لذلك تأكد انك اشتركت بالقناة عشان توصلك كل مقاطعي اول بأول, مع ذلك ماراح اترك المدونة وبنزل حلقة كامله عن رحلتي لأمريكا مفصله باذن الواحد الاحد. 

الى هنا احب اوقف, اتمنى استمتعت بالقراءة واستفدت, الى ذلك الحين, دمت سالماً.