نبذه عن جامعة الملك فهد للبترول والمعادن والسنة التحضيرية

بسم الله الرحمن الرحيم

اليوم جاي اتكلم مع الطلاب الجدد  واسولف معهم واحكيلهم قصتي والي مريت فيه في السنه التحضيرية من اول ماستلمت البطاقة الى ان استلمت نتيجة اخر اختبار توفل .

صراحه مادري من وين ابدا بالضبط لكن اببدا من الاوضاع الاكاديمية الي عايشينها بعض الطلاب هذه الايام بعد نهاية السنه التحضيريه وكيف الوضع صاير وايش ممكن تواجه انت كطالب جديد في هذه المرحله الي نمر فيها الحين, عشان نكون بالصوره, الجامعه او برنامج السنه التحضيريه مشترط انك تخلص السنه التحضيريه بترمين وصيف او ترم ثالث بتقديرات ماتنزل عن c في الرياضيات والانجليزي و d في بقية المواد بالاضافه الى شرط 500+ في اختبار التوفل المقدم من الجامعه والي يشمل الريدينق والقواعد والاستماع فقط بدون كتابة وتحدث.

من هذا المنطلق فيه طلاب عدوا السنه التحضيريه في ترمين وفيه ناس فيه ترمين وصيف وفيه ناس بيخلصون مع الترم الثالث لكن خلونا نسال عن الاسباب شوي ونستعرض ليش هذا التقسيم في النهايات؟

طيب, الجامعه مع بداية كل سنه تحضيريه يعملوا اختبار تحديد مستوىيحدد مستواك في اللغه الانجليزيه ويشوف كيف استيعابك اللغوي فيها في كل من القراءه والكتابه والتحدث, وبعد هذا الاختبار يتحدد مستواك في اللغه الانجليزيه من 00-04 فيه طلاب وضعوهم في مستوى المبتدئين جدا 00 او المبتدئين 01 او بقية المستويات مرورا ب 02 و 03 و 04. 

لذلك فيه فئتين من الطلاب تاخروا في اكمال السنه التحضيريه وهم من بدأو من 00 والطلاب الي اعادو كورس من كورسات الرياضيات الي هم 001 , 002.

خويكم معدي السنه التحضيريه في ترمين لا اكثر  بعد توفيق الله سبحانه لاني بديت من 01 ولا اعدت ولا كورس ولله الحمد. 

ما اوصف لكم كيف برنامج السنه التحضيريه قوي جدا جدا في تطوير لغتك وصارت لغتي من -10 الى 80%. 

خلونا نجي للفوبيا الي صايره من السنه التحضيريه المصون وهي صراحه الي مزعجتني شوي لاني اشوف كثير من الطلاب يعدلون عن قرارهم بدخول هذه الجامعه الي على قد ماتعطيها تعطيك بسبب بعض الاراء الدخيله على هذه الجامعه والي اشوفها فيها مبالغه نوعا ما.

لذلك:

- الجامعه ماتظلم ابدا!  .
- الجامعه جدا راقيه!!  .
- حقك تاخذه بالملم  .

طيب السؤال متى ما تاخذ حقك زي مايقولون؟ 

اذا جيت ياكبتن باقيلك درجة على قريدن ما  وتبيها بارده مبرده لا هنا اقولك هذا مو حقك من الاساس ياكبتن .
او اذا جيت تبي يشيلون عنك غياب مسببلك حرمان .
الخ..........)

هذي اشياء مو من حقك تطلبها لذلك لا تطلبها .

طيب وبعد وبعد؟ 

ايه تذكرت 

نبي نستعرض معكم مستويات اللغه الانجليزية في البرنامج ونشوف وش الوضع :
ENGL 000 :
هذا لفل بسيط جدا يأسسك لغويا في الكتابه والقواعد والقراءه بشكل مبسط ويتضمن اختبارين دوريين واختبار نهائي واختبارات تحدث بسيطه وانا ما اخذته لذلك ماقدر افتي لكم فيه اكثر .

ENGL 001

ااااااااااه ياقلبي  هذا اللفل حبيبي هذا بديت فيه الجامعه.
اللفل هذا مايختلف كثير عن خويه 00 الا انه زادو عدد الكلمات المطلوبه في اختبارات الكتابه, واستعرضوا القواعد بشكل مفصل قليلا ولا اخفيكم كنت متخوف جدا من المضي في هذا الكورس الجميل  << تعرفون فطفوط في الجامعه توه .
لكن كان فعلا جميل وعديناه بسلاسه .

ENGL 002
اسرع لفل مر علي في حياتي , لفل بالصراحه طورني في الراتنق كثير لان المواضيع تغيرت عن معشوقي ENGL 001 فاصبحت المسؤوليه اكبر شوي. كالعاده تكثيف كلمات الرايتنق واختلاف في كلمات الكتب < للاقوى طبعا, وفي هذا اللفل مطلووب عليه اختبار التوفل ولكن عليه 3% من مجموعك النهائي وهو هدفه في الحقيقه انه يستعرض لك الاختبار ويخليك تجربه لا اكثر .

ENGL 003
اغث لفل مر علي واصعب لفل في الحقيقه لانه معضله فصليه في الجامعه ولا بد انك تحاول تعديه بالي هي به , كان مطلوب علينا توفل 15% والباقي ماختلف عن اللفلات السابقه الكتب نفسها HEADWAY للقرامر وكتاب اضافي من NAT GEO للريدينق ولكن اضافوا كتاب جديد وهو للتوفل LONGMAN.

ENGL 004
حبيبي هاللفل هذا كان خفيف جدا وخلص بسرعه وكان تركيزه الاكبر على التوفل وماكان عندنا الا كتابين, كتاب احمر للتوفل وكتاب NAT GEO للريدينق والكلمات وكان جدا سهل هاللفل لانه بمجرد انك تعدي التوفل تعدي الاشياء كلها .

ENGL ep
هذا للي عدو كورس 004 ولا عدو التوفل :hehehe. وهذا كورس مخصص للتوفل فقط.


طيب ياوريات المستقبل نجي للرياضيات والفيزياء والوورك شوب :


MATH 001 :
مرحبا , هذا ماث بسيط جدا كله مراجعه للثانوي ولكن بشكل اكثف شوي ومع العاب وتركات جميله جدا راح تكتشفونها اذا جيتو  ولا تحافون يبيله مذاكره وتمرييييييييين قوي جدا لان اغلب الي اعادو فيه او اخفقوا كانت مشكلتهم التمرين .


MATH 002 :
 هذا احبه الماث مع اني جبت الطعه فيه شوي . لكن هذا تكمله لما اخذتوه بالثانوي ونفس النظام بكثافه وتعمق اكثر. وابرز مواضيعه اللوغاريتمز والدوال المثلثيه.

شيييك هالرابط لتتعرف على برنامج الرياضيات اكثر :

http://www.kfupm.edu.sa/sites/pypmath/default.aspx 

طيب نجي للفيزياء والي اسمه فيزيكال ساينس بالاساس لانه يضم الكيمياء والفيزياء معا 
هذا المقرر بسيط جدا كالعاده ويشمل مواضيع الثانوي ايضا ولكن بالانجليزي وهذي المشكله الوحيده الي ممكن تواجهها  والباقي سهالات :خخخ.

الوورك شوب (الورشه) والحاسب الالي:

ماراح اكتب عنها شي تعال واستكشف 


طططيب  ناس كثير تسال عن كيف نذاكر ياكبتن؟ افضل طريقه للمذاكره :

بصراحه المذاكره كل واحد وجوه لكن اكثر شي ممكن انصحك فيه هو انك تذاكر اول باول ولا والله بتخيس صيفي وترم ثالث كبر راسك . يعني كمثال الرياضيات لازم اول ماتخلص الدرس مع الكلاس لازم تحل اساله الكتاب (كلها) عشان تتمرن على الحل وبالاصافه الى اساله اختبارات قديمه متعلقه بالدرس.

ايش كمان ياربي ؟؟

ايه الجو وما جو وكيف الحياه بالسكن وماحياة :

الحياة بالسكن جميله جدا جدا جدا وانا مستمتع على الاخر وعايش جوي ونصيحتي اختار شريكك بالسكن اختيار فائق العنايه لانك بتتعب مع بعض النفسيات وانصحك بالفلاوي المهتم بدروسه وابعد كل البعد عن النفسيات لانهم ياثرون فيك بعض الاحيان. 

عن نفسي كان جدولي وخلوني اتكلم عن اخر فصل بعد ماروقت ودركت ام الجامعه :

اول ماصحى من النوم الساعه 7 اروح اغسل  < احلف. بعدها اروح افطر <  اها
وثثثثمن اروح الكلاسات  < عشت .

واذا خلص الدوام ارجع للغرفه واذا كنت مره تعبان انام ساعتين واذا كنت مو تعبان اطلع لمبنى الرياضه واسبح او العب سكواش (ختى لو كان عندي ميجر او اختبار او حتى فاينل) لان والله لها اثر قوي جدا على نفسيتك واستيعابك للمذاكره .

طبعا المبنى موجود فيه اشياء كثيره منها كرة القدم والاسكواتش والتنس ووووالحديد والسباحه .

الغدى والعشى والفطور في مطعم الجامعه ورخيص وكويس نوعا ما :كاك.

غسيل الملابس اما اني اغسلها بنفسي في مجمع الغسالات الموجود بين كل كم عماره او اني اوديهم للمغسله وادفع كمعدل 30 ريال كل مره.

----------------------

طيب, خلونا نرتب افكارنا شوي ونشوف ايش بنستعرض بهالجزء وخلوني احاول احصر افكاري عشان ما اجيب العيد في الطرح المصون !

الافكار التي ستتداول هنا كالتالي :

- السكن وصور عنه واسيابه وخرابيطه .
- الجمعيات وكيف ممكن تخدمك. 
- المول  وكيف يغير نفسيتك وكيف تستفيد منه .
- مبنى 39 والي هو مخصص لحصص التربيه البدنيه وكيف تستفيد منه وتزووره وتفل اومها هناك .
- كيف تتعامل مع المدرسين او الدكاتره البثرين ؟ 
- الاكل ومشاكله 
- الاكتئاب المفاجئ !! 
- برج الجامعة .

بحاول ما اخرج عن هالمواضيع لان لو الموضوع نال اعجابكم راح انزل بارت ثالث له ان شاء الله بحول الله .

طيب نبدا بالسكن ي عيال ؟ 

اولا: السكن جميل جدا < قل احلف  , والي مخليه جميل جدا ان الغرفه الي انت ساكن فيها من نظام متر في متر  يعني كل شي حولك ولك استقلاليه جميلة ورتب غرفتك زي مابدك  وراح تكون مسؤول عن النظافه والترتيب والتنظيم !! يعني بالعربي انسى اهلك  العماره الي راح تسكن فيها غنيه عن التعريف بداية بالي حواليها من زرع وعشب والرشاشات الي كل صباح راح تشوفها مرورا بالباصات الي بترج مخك كل صباحيه  لكن والله العظيم جمممميل جدا تطلع الصباح تتمشى لمبنى الاوريا (مبنى الانجلش) وتشوف القطيع الي رايح معك للمبنى  ومع رشاشات المويه والجو الجميل هذا  صراحة اتلخبطت المشاعر عندي لكن راح تجي وتشوف  < ماكنه شطح عن الموضوع شوي؟ 
طيب مرافق السكن ايش ياكبتن عبدالله؟ 

مرافق السكن وهي كالتالي:

1- دورات مياة اجلكم الله مشتركه في كل طابق في العماره والمكونه من ثلاث طوابق.
2- غرفة مذاكره والي تكون مشتركة ايضا لكن هذا غرفة للزنقات  يعني قفل عليك الباب وانت تنتظر الامن تك طال عمرك شوي لمن يجيك طويل العمر يفتح لك الباب . او اذا كان روميتك نايم ممكن تتكي فيها شويات .
3- غرفتك طال عمرك مرفق من مرافق السكن  والمكونه من سريرين ومكتبين ودولابين  ونافذه .
صور من مرافق السكن الجميل جدا :

هذي الغرفه من الخارج:



لكن راح تشوفها لمن تجي ارتب من كذا بككثير لا تخاف مجهزه بلحافات ووسايد وفراش جميل يحبه قلبك 




طيب اخلي لكم باقي الامور المتعلقه بالسكن ومرافقه اذا جيتو تستكشفونها .

ننتقل للشي الي بعدو والي هو الجمعيات او مجمع الخدمات الموجود بين كل كم عمارة والي يقدم خدمات جميلة جدا صراحه منها بقالة كبر راسك  ومكتبة يتوفر فيها خدمات تصوير وطباعه الخ.. وايضا في بعض الجمعيات مجمع غسالات ملابس او مغسلة تجاريه .

طيب خلوني اتكلم عن الجمعيات شوي, الجمعية زي ماقلت لكم موجوده بين كل كم عمارة وهي تخدم الطالب كونها توفر لك سوبر ماركت ومكتبة واحيانا مغسلة , البقالة اسعارها نفس بقالات برى لكن الي يميزها انها في غالب الاحيان توفر كل الي تبيه (كاسات, ملاعق, اكل, الخ........) اذا لا تقلق عزيزي الاوريا من ناحية هالموضوع طلعة برى الجامعه ماكو .

ننتقل للشي الثالث وهو الممممممول الجديد في الجامعة  !!
الموووول اه يالمول, خلوني دقيقة اتكلم عن مرافقة وايش يحتوي الى حد الان :

المول في الجامعة طبعا مول تجاري ويحوي الكثير من المرافق الي تصب في مصلحة الطالب بغض النظر عن اسعاره العاليه كونه ماهو تحت ادارة الجامعه  المول يتكون من:-

1- سوبر ماركت كبير جدا.
2- مطاعم متنوعه وتشمل (برقر كنق, كودو, كازا باستا, سب واي, فتوش) وفيه محل ذرة صغير وفيه كوفي شوب جميل نسيت اسمه وفيه ايضا مركز ترفيهي فيه تنس وبولينق وبلايستيشن وجلسات بلوت. 
3- موجوده مكتبه جميله تبيع ملخصات ونوتات واشياء راح تحتاجها بعدين.
4- زهور الريف للعطور والكماليات الشخصيه.
5- مغسلة ملابس.
6- حلاق لا بأس به.
7- صندوق البريد الي راح يسلمونك اياه مع اول يوم تجي فيه .
8- بس خلاص شتبي؟  طلابه هي .
صور للمول المصون :



ونقفل سالفة المول ياحبكم للعب  !

ننتقل للشي الي بعدووو والي هو مبنى التربية البدنية 39 المتنفس الرياضي في الجامعة بعد مبنى 11:

مبنى رائع بسيط يتكون من غرف عديده تضم العاب الاسكواتش والتنس وكرة القدم ومسبح يحبه قلبك وايضا صالة حديد شبه متكامله .

صور للمبنى الجميل:

المسابح ويوجد مسبحين في القامعه :





طيب, الباقي تعال استكشف طالع عمرك .

ننتقل للششي الجميل وراح نبعد شوي عن المرافق والاماكن والفله وهو كيف تتعامل مع المعلم البثر الضريف المستضرف الي مسوي فيها طارق العلي في نص الكلاس؟ 
طبعا لا اخفيكم ان هذه الفئه ماهي منتشره كثير لكن لو انقطيت مع الفلاوي هذا ايش تسوي؟ 


في الحقيقه في بعض الكلاسات الممله يطلع احمد الفرج الي داخل الاستاذ في نص الكلاس ويعطيها وضعيه المنتف  واحيانا تقعد بها انت !  لذلك عزيزي الاوريا في جامعة البترول انصحك تحط كرامتك في كيس مؤقتا (هذا الكلام مايعني انك راح تنهان ولا راح يتسفل فيك) لا ابدا  كل مافي الموضوع انه راح ينمزح معاك مزح دكاتره  لذلك لا تكون ردة فعلك خشنه بالعكس روق واظهر انك مروق ولا اهتميت واضحك وفلها ماراح ينقص منك شي .
ولا تتصرف اي تصرف ممكن يقلل من قيمتك او يضهر انك متنرفز او معصب.

الشي الي راح ننتقل له هو الاكل وكيف ممكن تدير اكلك وتحافظ على وزنك: 

طبعا ان من اكثر الاشخاص الي تضرر وزني وتغير جسمي بسبب الاكل في الجامعه لكن الغلط مني انا بتقول لي كيف؟ اقول لك كنت مفرط في الاكل في المطاعم او بالاحرى الوجبات السريعه بينما مطعم الجامعه والي عليه خلاف كبير بين معجب وغير معجب بالاكل المقدم الا اني بصفتي طالب اشوفه مقبول واكل جميل وممكن تتقبله طول الاسبوع لان فيه تنوع احيانا باالاكل والفتره الاخيهر شغلهم نظيم وتوقعاتي بالافضل الترم الجاي ان شاء الله فلذلك اكل المطعم المقدم من الجامعه جدا صحي ويقيك بعد الله عز وجل من مشاكل السمنه والامراض الي تسببها الوجبات السريعه .
الي بعدو؟  

الاكتئاب المفاجئ او الضيقه المفاجئه الي تجيك بسبب الغربه او ماشابه  وهذي طبيعيه جدا وعشتها انا وكثير من الاخوان وهي تحس ان الجو كئيب والوضع مايستحمل وانك تبي تطلع من الجامعه و و و و و اشياء تعور راسك  لكن والله انها اوهام وقلق مال امه داعي انا اشوف  والحل انك تروح حدى هالمساجد المباركه الي موجوده بين كل كم عمارة وتصلي لك ركعتين وتطلع تتمشى وتحاول انك توازن بين الفله والدراسة عشان تتجنب مثل هذي الحالات المزعجه .
لذلك المساله جدا بسيطه ولا تحاتي من ناحية الضيقه ماضيقه لان الله عز وجل مع عبده طالما عبده معه .

نجي للشيء الاهم في نظري وهو برج الجامعه :

في غياب اهلك اعتبر ان هذا الشي المطل على الشوارع الرئيسيه لمدينة الظهران المراقب لك والناصح وكل شي  < نفسيه الولد. يعني لمن تطلع وتتاخر وتلعب كوره وتستهبل طالع البرج واعتبر انه يطالعك  وعود غرفتك ياوريا على طول .



الجزء الثالث: 
- الكلاسات وكيف جو الدراسة في السنه التحضيريه .
- وين الصعوبه في الموضوع؟ ليش جامعتنا صعبه؟ .
- دورات المياه .
- اسألة الاختبارات ونظامها في السنة التحضيريه.
- مستوى التعليم وكفاءة المعلمين في السنه التحضيريه.
- نظام عليه اختلاف كبير في القريدات وتوزيع الدرجات في السنه التحضيريه راح اتكلم عنه بشكل مفصل وواضح للكل.
نبدا يا اوريا؟ 

الكلاسات  وما ادراك مالكلاسات  الكلاسات وخصوصا في مبنى 58 قصتي معها قصه ! اتدرب فيها واذاكر فيها واسوي كل شي فيها خصوصا في بداياتي في السنه التحضيريه لان زي مانتو عارفين هدوء وكذا جو مهيئ للدراسه, الشي الثاني الكلاسات طبعا مفتوحه 24\24 ماتسكر ماعدى الويك اندات < متعوب عليها . 

طيب, هل الكلاسات ممله؟ 

جدا  لكن مو كلها طبعا يعني في الاساس هي تعتمد على المدرس الي ماسك الكلاس هو الي يعمله ممتع وهو الي يخليه ممل  يعني اتكلم عن نفسي كان اول كلاس جدا جدا ممتع في الانجليزي الي هو 001 وايضا الماث لان كان المدرس ينكت وينتف شويات اثناء الدرس فمسوي جو  لككككككككن !!  بعد ماتخلص كم مستوى انجليزي راح تشوف ان الوضع زاد عن حده وبتطفش طفش الله اعلم به لانه تعرف عندك باليوم 4 كلاسات انجلش فراح تكون ثقيله اذا وصلت 003 او 004  لكن تعدي سهالات ي رجل 
طبعا كل كلاس مجهز تجهيز كامل تقنيا بحيث تتيح للمعلم فرصه ايصال المعلومات بشكل سلس وجميل .

خلصنا من الكلاسات؟ 
نجي للجامعة وصعوبتها وليش هي صعبه و و و و و الخ....) 

انا ابي اعرف صعوبه من اي ناحيه؟ 

شرايكم نبدا حبه حبه ونشوف الصعوبه وين موجوده فيه بالظبط 
المناهج؟ المناهج في نظري جدا رائعه ماعدى كتاب الفيزكس لان عندي تحفظ كبير عليه  يعني عندنا في الانجلش نستخدم headway راح تشوفه ممتع جدا اول كورسين وايضا كتاب التوفل اجد فيه متعه بشكل ماتتصور وانا احل الاسئلة المتعلقه بالقرامر  وناهيك عن كتاب الرياضيات الرائع جدا رغم سهولة اسالته الا انه يبنيلك اساس قوي جدا خصوصا اذا حليت اسالة اخر كل درس حل كامل (كلها) راح تحس انك فعلا ماثيماتيكال .

الاسأله؟ هنا خلوني اوقف شوي  عندنا في جامعة البترول في الحقيقه مايبونك تحسب  يبونك تفكر  يعني بالعربي الجامعات كثير في المملكه لكن هنا بجامعة البترول يبغوا يطلعوا ناس تفكر مو تحسب ! وهذا شي بالنسبة لي له سلبياته واسجابياته لكن فعلا اسألة اختباراتنا فيها من الالعاب كم هائل وتعقيد احيانا  لكن في نفس الوقت فيه اساله مال اطفال .
ضغط الواجبات والمذاكرة؟ هنا من جد خلوني اوقف  لان خصوصا طلاب السنه التحضيريه مطالبين بجهد قوي جدا جدا لاجتياز هذه السنه عشان كذا حذرت ونصحت بانك تتابع اول باول ولا تغلط غلطتنا الواجبات بالنسبة للانجليزي ماعليها تركيز ونادرا ماتاخذ واجبات لكن في الرياضيات فيه موقع الكتروني مخصص للواجبات وعادة الواجب يكون اسبوعي درسين او ثلاثه وينتهي تسليمة يوم الاربعاء ونظامه سهل جدا لكن الاساله يبيلك تتعب فيها بس للتسهيل الجامعه حطت مع كل سوال مثال محلول مطابق للسوال المعطى ونادرا مايكون مختلف  وايضا شروحات بالفيديو لأفكار السؤال .
عموما الجامعة يا اخوان ماهي صعبه ولا هي سهله  نظامك انت واسلوبك هو الي يحدد هذا الشي يعني والله العظيم اذا جيت عن نفسي انا كطالب مستواي B-A من B الى A كقريدات والله اشوف الجامعه يبيلها شغل بس يعني التفوق ممكن تحصل عليه لكن مو بسهوله يبيلك تتعب .
ومثل ماقلت سابقا الجامعه جامعة ناس متميزين مايبون طلاب D يدخلون تخصص عشان كذا شددو في القوانين والمتطلبات واذا ماتحب هذا النظام الجامعات واجد طال عمرك .
خلصنا من الصعوبه الي ابلشتوني فيها .
نجي لدورات المياة !

دورات المياة باختصار تعتمد على الكباتن الي ساكنين معك بالعماره  وغير كذا ماقدر اتكلم .
طيب ننتقل معكم الى مستوى التعليم عندنا بالسنه التحضيريه وكفاءة المعلمين:
مستوى التعليم من ناحية اللغة قوي جدا جدا واتكلم عن نفسي قبل الجامعة كانت لغتي مو سيئه ولا ممتازه لكن كنت مبتدئ وامشي اموري لكن والله يا اخوان بعد البرنامج الي مشيت فيه من 001 الى 004 والتوفل لغتي تطورت تطور ملحوظ جدا  وصرت اسمع وافهم واسولف مع اجانب و و و و .

كفاءة المدرسين:
صراحه عندنا في قسمي الرياضيات والانجليزي كادر من المعلمين وهم صراحه مزيج من معلمين ممتازين جدا جدا وممتازين ووسط وسيئين, في نظري نسبة الممتازين جدا جدا تشكل 30٪ من عموم المعلمين والممتازين 40٪ والسيئين او الوسط 30٪. يعني راح تلقى النفسيه والحبوب والفلاوي والكئيب و و و و .

ننتقل الى نظام توزيع الدرجات والمشكله الصايره في قسم الانجليزي :
في الحقيقه صارت مشاكل واعتراضات وشكاوي كثيره على الية توزيع القريدات والدرجات وكيف تحتسب درجاتك في النهاية وعلى اي اساس لكن انا صار لي لقاء مع مدير السنه التحضيريه د. العساف لقاء مطول جدا وتكلمت فيه عن هالموضوع وكان رده مقنع جدا جدا جدا بالنسبة لي وريحني  المشكله هي ان في نهاية كل كورس درجاتك تتغير  يعني اذا انت ماخذ في اختبار التحدث 70 ممكن تلقاها اخر الكورس 80  قلت للعساف ياكبتن ليش كذا  لانه احيانا تكون 80 وتنزل 75  قال لي هذا اسمه NORMLIZATION قلت وشو ذا النورملزيشنان ؟  قال هذا نهاية كل كورس نعيد النظر في الدرجات ونشوف المدرس كم اعطى في اختبارات الكتابة والتحدث مع طلابه ونقارنها بالعموم لان ممكن انت تتكلم قدام مدرس يعطيك 80 وعند ثاني يعطيك 0 كبر وجهك  عشان كذا احيانا يصير ظلم لطلاب سكشنهم او شعبتهم مخفوس فيها لكن مبدعين في الاختبارات التحريريه الي تتضمن الاستماع والقراءه والقواعد عشان كذا درجتك تتغير لكن اذا ما نفعتك ماتضرك على حسب ملاحظتي للطلاب الا الي يبي A+ , A هنا شي ثاني لان الربع يفرق معه. 

بالنسبة لدرجة النجاح في كل كورس تعتمد على الافرج للطلاب الي هو متوسط الدرجات في الكورس على جميع الشعب ومن ثم تتحدد درجة النجاح وفي الغالب ينزلونها خمس درجات يعني اذا كان الافرج 70 تنزل درجة النجاح الى 65 .

هذا كان اللي عندي والله يوفق الجميع .