بسم الله الرحمن الرحيم,
عدنا مرة اخرى يا احبابي,
Term: 141
أو كما ان احب ان اسميه, ترم "Yeeeeeeeeeeeees!!!!!!" طبعا راح تعرفون قصة Yes هذي مع نهاية هالتشابتر من المذكرات
!كانت موادي كالتالي:
طيب, نبدا مع هالترم مادة مادة كالعاده!!
PE101:
اول كورس رياضي في الجبل وكان مثل ماهو واضح في الصوره مع محمد حمدان (الريشه), لعبه جدا جدا جدا ممتعه وحبيتها, وبصراحه اعتب على الجامعه عتب شديد على اهمالها لهالنوع من الرياضه, لا المضارب في حاله كويسه, ولا فيه توفر للادوات الكامله للعبه, والمساحات للعب جدا ضيقه! وهذا سبب قوي خلاني اترك اللعبه بعد الكورس! عموما, الكورس كان مع محمد حمدان اللي درسني بالاوريا (سكواتش), الرجال شريح بشكل قوي جدا, حبوب, ضحوك, وبصراحه انبسطت معه في ذاك الترم, كانت الماده جدا خفيفه, اختباره كان سهل (صح او خطا), اخر الترم دف اغلب الكلاس
.Physics 101:
Guldad Khattak, رعب الاسم يكفي اعتقد ولا؟ المهم ان هالدكتور احبه واكرهه في نفس الوقت, كيف مدري, كان عندي الساعه 7 وكنت غلطان غلطان غلطان اني نزلت عنده, لان مستواه عالي جدا وشرحه للطلاب ال advance وانا كان مستواي عادي جدا في الفيزكس, كان مايحب احد يتكلم او يتنفس او يحرك رجليه او يطلع جواله او يحرك حتى شنطته, مره من المرات كنت بطلع الحاسبه وفصل علي فصله يحبها قلبكم
, واذكر بعد مره كنت جاي وحاط السماعات وبدا الكلاس ونسيت اشيلها وقال لي قيت اووووت 
ههههههههههههههههههههه ! لكن اكتشفت بعدين انه يحترمني كطالب وكان ينصحني دايم بالاوفس اور ويساعدني بحل المسائل وماقصر معي.وهنا تجي قصة "Yessss", مره من المرات كنا في كلاس ريستيشن في مبنى 6, دخلت وجلست وكان الميجر الثاني في نفس اليوم (الليل), دخل وعطانا كم مسأله وقبل لا يتعب ويجلس راح وكتب مسأله ايجاد سرعه بأحد قوانين السرعه في الفزكس, يوم تعب وهو يكتب قال, "I'm not going to do it" وطاحت عينه على طالب وعطاه الطبشور قال له solve it وراح جلس, قام الطالب وجاب العيد وجاب له ناتج فيه جذر داخله رقم سالب هههههههههههههههههه! وانجلط ختك ! راح وقال له خلك واقف, قوم طالب ثاني وراح يحلها ونفس الشيء طلع له جذر سالب !!!
انهبل مره ثانيه, (طبعا كل الطلاب اللي قومهم كانو افضل طلاب الكلاس), بعدها قوم طالب ثالث وحاول يغير الحل وانحشر, وهنا جات الطامه الكبرى , طاحت عيونه المرعبه علي انا وقال لي go, ولسان حالي يقول: (حظي عجاج والحبايب قراطيس) 
, قلت الشكوى لله وقمت وانا اجر واسحب رجليني للسبوره ومادري وش بيصير بي , واطالع المسأله واتمقل فيها خمس ثواني تقريبا وهو يقول هاه ؟ وسسسسسسسسسبحان الله نزل علي الفيزكس في ذاك الكلاس وقلت له هذي القيمه مفروض تكون سالبه لان المقذوف نازل من فوق الى تحت وتعتبر المسافه بالماينس (y), وبعدها التفت وماسمع الا "YESSSSSSSSSSSSSSSSSSSS!!!!!!!" وخويكم اللي يعطيها وضعية اينشتاين ههههههههههههههههههههههه والحقيقه انبسطططت 
.اكبر خطأ سويته في هالكورس اني سمعت كلام بعض الزلايب عن الكورس وانه صعب ووحش الجبل ومدري وش, وفعلا اثر هالكلام على مستواي وعلى القريد النهائي في الماده!
ICS103:
مع الشيخ حازم سلمي
, الاستاذ الحماسي الجميل الفاهم المتمكن الخ..... كورس البرمجه بلغة C, كان كورس ممتع وجميع وفي نفس الوقت ثقيل جدا, افكاره مترابطه من اول سلايده الى اخر سلايده وحط على كلمة سلايده الف خط هههههههههههههههههههههههه, كويزاته كانت صعبه وطويله لكن في اخر الترم شوتنا كلنا بالكلاس وورك, وكان الله يذكره بالخير يقول ببداية الترم, you get what you get, كان يسميني في الكلاس "داعج", وكان معتبرني من افضل طلاب الكلاس واشكره على هالشيء, كنت مهتم بالماده ومهتم بهوموركاتها وبأدق تفاصيلها, والى يومكم اتذكر ايميلاتي مع الدكتور وقت اخر السمستر مع وقت نزول القريدات, كنت متأمل على B+ وكنت جايب العيد بالفاينل ومبدع بالميد والكلاس وورك واللاب والبروجكت كان بيرررررفكت! وارسلت له مليون ايميل اسأله هل فيه امل اخذ B+ او لا, ارسلي مره وقال "ياعبدالله انت الان ماخذ في الفاينل 58/100!! اصبر ونشوف" انا قفلت معي وقلت له انا برى الظهران فضلا تأكد من التصحيح وعلمني لو فيه زياده, ارسل لي وقال "ابشر", بعدها بربع ساعه شفت الدرجه تغيرت في البلاك بورد من 58 الى 65!! ,وقلت الحمد لله, المهم بعد كم يوم ارسلت له هاه وش صار؟ قال "شكل الكم بوينت اللي زدتك اياها سوت سوم سورت اوف ماجك" وخويكم اللي ينجلط من هالايميل الطلسومي! قلت له وش يعني؟ قال اصبر, يوم حشرته ارسل لي بخط كبيرررررررررر "You scored, it is not a typo!!!!! you got A" وخويكم كان في موعد شد تقويم اسنان والله واسحب عليه من الفرحه واطلع هههههههههههههههههههههههههههههه! وانتهى الكورس بقريد يفرح! MATH101:
مع الدكتور القدير محمد ابو صبيح, دكتور لبق وبشوش الله يذكره بالخير, كان مهتم بالكونسبت اكثر من حل المسائل, وقبل هذا كله كان يهتم بمدى فهم الطلاب ومدى تطور شباب الامه العربيه! الله يسعدك يادكتور محمد ابو صبيح!...
الكورس كان بشكل عام متوسط الصعوبه وفيه من غثاثة البروف والخياس هذا, لكن كان كورس ممتع مع الدكتور محمد, اتذكر صار لي موقف معاه ما انساه طول عمري وكنت بجيب العيد بس الله ستر, كان عندنا كويز وفيه سؤال limit, وكان يقول اوجد اللمت, خويكم راح يتفلسف وطبقت قانون لسه ما اخذناه (لوبيتال) والحمد لله طلع الجواب صح! واتفاجأ يوم وزع الكويز معطيني على السؤال 1/5, اقول له ليش؟ قال ماخذناه لسه, قلت له يادكتور مو من حقك تجبرني على طريقه معينه ومدري ايش المهم انتهت السالفه بأني اعتذرت وقلت له اسف اني تحمست زياده واتأسف لك, جلس يضحك وقال: "انت ابني, مافيش أب بيزعل على ابنو" ههههههههههههههههههههه حبيبي ابوصبيح!!
IAS101:
وتستمر علاقتي المتوتره مع قواعد اللغة العربية في هالكورس المخبول! اخذته مع الدكتور عبدالكريم الزهراني, اكتفي بقول ان هالدكتور ظلمني بالقريد اخر الترم والله يسامحه, وكان سامج الله يذكره بالخير:.
ENGL101:
مع حبيب قلبي Anthony Gibson, بصراحه هذا المدرس اثبت لي عكس كلام كل الطلاب بخصوص ظلم وتعجرف قسم اللغة الانجليزية وانا طبعا ما انفي ظلمهم لكن هالاستاذ بالذات كان حقاني وكان يقول انه مايهتم بالافرج وخرابيط القسم وانه مستعد يعطي كل الكلاس A's, صراحه اتذكر في هالكورس اني تحطمت من ال proficiency exam! لانهم معطيني D في الرايتنق! لكن الحمد لله ما استسلمت لهالتقييم المخيس وكرفت كرف مع نفسي في هالكورس واتذكر قبل كل اختبار اتمرن على مواضيع اختارها من نفسي لها علاقه باسلوب الاختبار وارسل له ملفين الى ثلاث ملفات وورد تدريب وكان يصححها ويرسليهاه مره ثانيه على الايميل وكان مبسوط مره من شغلي الى ما جا اول اختبار رايتنق وعطاني B+ وماكنت مصدق!! واستمر الاداء الممتاز وانهيت جميع باقي اختبارات الرايتنق ب A, واتذكر جملته يوم قالي بالحرف "You're a very good writer" ومره من المرات "Your writing is awesome", بس كنت مخربها معه في الريدينق واتذكر مره قال لي في 102, "You will get an A+ in this course but can you please do something with your deadly reading?"
وللاسف خربتها معه الى نهاية 102 في الريدينق لكن نقول ان شاء الله نبيضها في 214 (معه). ----
انتهى هالسمستر بطموح عالي ومعدل نوعا ما مرضي وجميل وكنت مبسوط من نفسي رغم الصعوبات القاهره اللي واجهتها, 17 ساعه اول ترم كانت نوعاً ما قاسيه ووعدت نفسي ما اكررها لكن للاسف كررتها, لكن هالتكرار كان من صالحي واعتقد اني بنزل 17 كل ترم, اكتشفت اني طالب يهتم ويبدع تحت الضغط, ويهمل اذا كانت ساعاته قليله.
في هالترم كانت عندي مبادئ مستمره الى الان اهمها:
1) انت صديق نفسك ولا تنتظر من احد يكون صديقك !
2) لا تعتمد على احد ابداً !
3) لا تسمح لأحد يثنيك عن احلامك او يعطلك عن امورك الشخصيه او الدراسيه !
4) ان كان عندك "واقع" مُر, ارفضه.
5) اتعب بالبدايه وارتاح بالنهايه.
اعترف: اللغة الانجليزية مع كل اسف سببت ضعف واضح في لغتي العربية, احيانا ما اعرف اشرح الا بالانجليزية !
الى ان القاكم في 142 (سمستر التفجير)
.بكون سعيد جدا بإجابتي على اي سؤال, ask.fm/eng3b .
ليست هناك تعليقات:
إرسال تعليق