مذكرات ويوميات جامعية (11) (أجمل وأسعد خمس شهور في حياتي!)

بسم الله الرحمن الرحيم 

اللهم لك الحمد حتى ترضى ولك الحمد اذا رضيت ولك الحمد بعد الرضى ولك الحمد على كل حال 

السلام عليكم ورحمة الله وبركاتة 

حياكم الله جميعاً في هذي الحلقة الجديدة من ذكرياتي الجامعية واللي راح اغير فيها نمط الكتابة نوعاً ما وتقسيم الحلقة عشان تكون اكثر متعة للقراءة واكثر فائدة, في الحلقات السابقة كنت اتكلم بشكل عام ببداية كل حلقة بعدها انتقل للذكريات الدراسية لكل مادة واختم وتنتهي الحلقة, اليوم جايكم بشيء جديد, راح اعامل كل حلقة جاية على شكل فترة زمنية من الشهر الفلاني الى الشهر الفلاني واتكلم عن ذكريات كل شهر فيه بإذن الله. 

احس ان هذي الطريقة راح تكون حلوة واكثر متعة! 

توافقني؟ سواء كنت توافقني او تخالفني الرأي, اكتب لي هنا رأيك:

www.eng3b.sarahah.com 

وفيه شغله ابي اقولكم عنها بعد, اتمنى من كل قلبي بعد نهاية قراءتك لهذي الحلقة تروح للرابط فوق وتكتب اي شيء ودك تكتبة او تحس فيه او ودك اني اعرفه او حتى نقدك وتعليقاتك ونصايحك, بفرح فيها وبتقبلها بصدر اكثر من رحب! لا تنسى! عشان ماتنسى حط منبه بسرعه < ياليل النشبه ههههههههههه. 

اليوم مثل ماقلت بتكلم عن ذكرياتي على شكل فترة زمنية وحلقة اليوم راح تكون من شهر December 2016 الى شهر May 2017 وهي ببساطة من أول مارجعت من امريكا (برنامج التبادل الطلابي) الى نهاية سمستر 162 (اللي نكبونا فيه P:)

December 2016

من أجمل الشهور اللي مرت علي في حياتي, كوني اختليت بنفسي لمدة طويلة نوعاً ما وابتعدت عن كل الناس في هالشهر! احيانا تحتاج هالنوع من الخلوات والعزله البسيطه اللي مفروض ماتطول ومفروض ماتكون قصيرة كثير, نوع العزله اللي اتكلم عنها هي يوم تتعرف على نفسك! ايه من جدي اتكلم... فيه ناس وانا اولهم احيانا ينسون انفسهم! مثل ما انا احيانا انسى نفسي وانسى وش احب و ايش ممكن يضحكني, وش اللي يشدني وش اللي مايشدني.. احتجت ديسمبر عشان اقدر ارجع نفسي لنفسي.. احتجته عشان امارس هوايتي (التأمل), التأمل يرجع لك نفسك المسروقة من عجة وزخم الناس, تناقضاتهم, مشاكلهم, ازعاجهم, روتينك الممل!.. يذكرك بقد ايش انت في نعمه ومفروض تحمد ربك عليها.. العزله هي اللحظة اللي لما شوف فيها شيء يشدك تبتسم بلهفه, ليه؟ لانك لحالك ومافيه احد يسرقك من هاللحظه, هي لحظات الضحك البريئ, هي اللحظة اللي لما تجلس تتأمل وتطالع شيء معين لمدة نص ساعه بلا ملل ولا كلل! ... ايه نعم, ديسمبر هو الشهر اللي رجعت فيه نفسي لنفسي, هو شهر العودة, ديسمبر كان شهر عزلتي...

نرجع شوي لشهر نوفمبر, اثناء مذاكرتي لمادة MATH301 في امريكا, في لحظة تسمى "القفله" (مثل يوم يقولك واحد ترى قفلت معي).. فتحت موقع Expedia عشان اشوف اسعار الطيران والفنادق والانشطة في ميامي! (لاااااااا ياعبدالله انت كذا خذتها لبعيييييد عزلتك ذي!!!!!).... والله فعلا اخذتها بعيد! 

كانت عودتي للسعودية في تاريخ 19 ديسمبر فجراً ونهاية اختباراتي في 5 ديسمبر.. قررت ازور ميامي في رحلة من اجمل رحلات حياتي من 13 الى 18 ديسمبر وكانت بالمجمل خمس ايام.. 

طبعاً من بداية ديسمبر كان الجو في قولدن مثلج جداُ! الشوارع مغطاة بالثلوج, الناس تطلع تكب موية حاره على الثلج عشان تقدر تحرك سياراتها! شيء مهول كمية الثلج في ذاك الشهر.. الى الان اتذكر اللحظة اللي طلعت فيها للدوام لكلاس ماث, وكانت اول مره عيني تشوف فيها ثلج يتساقط.. الى الان اتذكر احساس الثلج على وجهي وملابسي والضحك الهستيري اللي جاني ولا اعرف سببه D:... اللي اعرفه اني كنت مبسوووووووووووط!!!!

الساحرة قولدن في ايام الثلج! ما اقدر اوصف لكم مدى روعة المدينة في وقت الثلوج! 

وفي ليلة زي هالليله, كنت ارتب الباك باق للرحلة الجميله هذي, في ليلة مثلجه جدا, كنت في غرفتي اتأكد ان كل شيء موجود بالشنطة, التان, الملابس, الشواحن المتنقلة (كان عندي اثنين مو واحد هههههه).. رحلتي كان باقي عليها سويعات (متعوب على سويعات) كنت طالب وقتها من امازون اغراض للبحر, شورت سباحه وكاب واشياء بسيطه.. طلعت للـ Mail box وسط الثلوج الكثيفه.. امشي ورجلي تغوص في الثلج وبالكاد قدرت اتحرك.. وصلت للبوكس وطلعت الاغراض وتوجهت للسكن مره ثانية.. 

طول فترة الثلوج كنت حريص اني ما ازلق! :) وخلاص يعني صملت ومابقى الا كم يوم وارجع السعودية بعد ميامي لكن كان مكتوب لي اني امسط مسطه ياليتك شايفني هههههههههههههههههههههههههههه! قربت من العماره ودست على ثلج اللي كنه مويه.. مالكم بالطويله طحت على ظهري طيحه! الجدير بالذكر اني قمت اضحك لاني اكتشفت اني خسرت تحدي عدم السقوط P; 

دخلت الغرفة وشيكت على كل شيء وطلبت اوبر وفي قلبي اقول (تعال يرحم امك ودني المطار وطلعني من هالفريزر قولدن!) 

وصل اوبر وركبت انا وشنطتي وتوجهت للمطار في دنفر...

وصلت المطار وتوجهت للبوابة المكتوبه بالتذكره A40 وجلست انتظر الرحلة... ماعندي ادنى فكرة عن سبب غرامي باغنية (حيرت قلبي معاك) لكوكب الشرق ام كلثوم في ذيك اللحظة... 

وفي الصورة هذي بالذات كان المقطع اللي اسمعه يقول:

يا قاسي بص في عنيا وشوف ايه انكتب فيها
دي نظرة شوق وحنيه ودي دمعه بداريها
وده خيال بين الاجفان فضل معايا الليل كله
سهرني بين فكر واشجان وفات لي جوه العين ظله
وبين شوقي وحرماني وحيرتي ويا كتماني

بدي اشكيلك من نار حبي 
بدي احكيلك عا اللي في قلبي
واقول لك عاللي سهرني واقول لك عاللي بكاني
واصور لك ضنى روحي وعزة نفسي منعاني!!

ولا زال للانتظار بقيه... 

هذي هي البوابه! 

بعد انتظار بسيط.. اقلعت رحلتي الى مدينة ميامي ذات درجة الحرارة الثابته 24-26 C... وبعد كم ساعة بدينا نحلق في سماءها الجميله.. رجعت كتاب نزار قباني (شاعر المرأة والحب) في الشنطه وفتحت الستاره وجلست اتأمل بالساحل وكيف منور وجميل جدا! كان الوقت 2 الفجر.. نزلت واستخدمت الباص عشان اوصل الى Miami Beach South لاني موعود مع (Hostel) معفن جدا هههههههههههههه..

وصلت الهوستل ودخلت وكان باستقبالي رجل افريقي وكان نصه نوم, لو احركه شوي طاح ونام! هههههههههههه بعد انتظار 3 ساعات وانا كنت برضه نصي نوم وابي انام وتعبان جدا! جاء السيد الكريم واعطاني فراش ولحاف ومفتاح صندوق ومنشفه وقالي توكل على سرير 137! قلت ياكبتن دقيقه ههههههههههههههه وشو اللي 137.. قال تعال اعلمك... كانت الساعه 6 الصباح تقريبا والناس بدت تصحى في الهوستل!! وانا ابي انام وتعباااااااااان..

(الهوستل: هو مجمع اسرة نوم تحت سقف واحد, تقريبا 100 سرير (دورين) ولكل سرير خزانة خاصه فيه)

طبعا من حظي الجميل, كان سريري فوق, وابتلشت صراحه ياراقي بهالسلم يانازل! ومع كل اسف كان اللي تحتي بنت لاتينيه.. غبنت ام ام امي!!!! (بعلمكم ليه) المهم اني صعدت وفرشت وانسدحت ابي انام.. وكل شوي بنت ستين في سبعين تصقع بالخزانه حقتها في الغرفه (طراخخخخ!)... وافزع من النوم... ياليل الليل! 

حاولت انام ويوم غفيت شوي الا وبنت ابليس تبدا تتكلم مع سلوقي برازيلي وتبربر معه لين جد ماعرفت انام!!! قلت يبوي قم رح البحر وفلها والمغرب يحلها ربك... 

قمت ونزلت وعطيتها نظرة الله لا يوريهم ههههههههههههههههه.. 

بدلت ملابسي ورحت البحر الجججججججميل!!! 

في طريقي للشاطئ

وصلت واستاجرت كرسي وحطيت رجل ع رجل هههههههههههههههههه..

يمديكم على الكاب؟؟؟ 

هنا فيديو لأول لقاء لي مع شاطئ ميامي.. 

بعد قضاء وقت جميل بالسباحه وشرب العصيرات المنعشه قررت ارجع الى الهوستل المشؤوم واحاول انام.. كان هالكلام 4 او 3 العصر.. دخلت وحاولت انام وفعلا نمت 5 المغرب لكن صحيت 6 المغرب بسبب بنت ابليس اللي مادري ليه ماتطلع تشوف لها شغله تسويها! وتخليني انام في حالي...

وقتها فار دمي من العصبيه لكن في نفس الوقت كنت اعرف حدودي واعرف ان وقتي ماهو وقت نوم هذا اولاً.. ثانياً حجزي كان بإرادتي وكنت ادري ان المحل ازعاج وادري اني انسان ماعرف انام والمكان ازعاج ومع ذلك تفلسفت وحجزت.. اخيراً قررت اني انتقل واسحب على الفندق هذا من اول ليله كونه غير مريح وبينكد علي واخذ لي غرفة خاصة في فندق راقي قريب... 

حجزت وانا منسدح على السرير ومعصب في فندق La Flora الرائئئئع جدا.. حتى صخب شوارع ميامي ماتسمعه في الغرف وهذا شيء نادر.. رت للفندق ونعمت بنومه جدا جميلة... حتى رن المنبه الساعه 6 الصباح...

اليوم الثاني في ميامي وكنت موعود برحلة جميلة جدا لجزر ال Keys تسمى ب Key West Florida.. الساعه 6 ونص تقريبا خلصت لبس وشلت اغراضي وقهوتي وطلعت انتظر الباص بنفس المكان اللي حددوه لي في الايميل تبع الاكتفتي... 

انتظرت وفي لحظة, شفت باص مكتوب عليه Key West جالس يقرب مني ووقف يمي وفتح الباب وقال (ابدواللاه؟) قلت (يس ابدولاه) قال انقز يالذيب يلا بنروح P: وركبت وكانت الرحله بالباص تقريبا 3 ساعات ونص الى جزيرة الكي ويست.. 

طريق الجزيره هذي فيه جسرين.. الجسر اليميني مبني من مئات السنين وغير قابل للاستخدام ومخلينه كتراث لمدينة فلوريدا... اما الجسر اللي كنا نمشي فوقه مر بنا على اماكن جدا جميله خلال رحلتنا الى الجزيره وكانت الرحله غنية جدا بنغمات فيروز! 

قربنا من الجزيرة وكان من اهم الاشياء اللي قالتها فيروز: 

علموني هني علموني
على حبك فتحولي عيوني
والتقينا وانحكى علينا
علموني حبك ولاموني!!!

طبعا طول الطريق كان سواق الباص المكسيكي يتكلم ويعرفنا بتاريخ الكيز وفلوريدا وايش راح نشوف هناك..

طبعا في محطة الاكل.. عرض علينا السواق انشطة كثير تتسوى بالجزيره منها البارشوت ورحلة الغوص.. 

اخترتهم كلهم P:

وصلنا الجزيرة ووقفنا الباص وحددومكان نقطة التجمع الساعه 4 العصر والكل من الركاب توجه للمكان اللي يحب او النشاط اللي حجزه مع سواق الباص... 

كلمنا سواق الباص وقال اللي حجز رحلة الغوص يجي معاي.. وانا بكل فففرح قلت قدددددددام هههههههههههههه... 

الصور ابلغ من الكلام... 

هنا بعد ماتقهويت وطلعت بهالفجر الجميل انتظر باص الرحلة... 

وصلنا وركبنا القارب وابعدنا بعييييييد عن اليابسة متوجهين للمكان اللي فيه اكثر انواع المخلوقات البحريه.. 

وهنا مقاطع فيديو منوعة...

وهنا يوم عرف كابتن الغوص ان عندي جوال ضد المويه طلبني اصوره وياليتني ماصورته لانها معفنه ههههههههههههههههههههه.. 

ويوم وصلنا حرصت اني اصور معاه لاني ابلشته بالاسئله...

وهنا صورة وداعية للقارب اللي عشت فيه لحظات جدا جميله واللي تعرف فيه على صديق نرويجي وبتكلم عنه بعد شوي... 

بعد رحلة الغوص توجهنا للبارشوت (باراسيلنق)... 

هههههههههههههههههههههههههههههه كنت منخرشششششش....

بس خلاص مابي افضح نفسي اكثر هههههههههههههههههههههه...

وهنا برضه حرصت على التقاط صورة تذكارية مع صديقي النرويجي... 

انتهت هالرحله بكل خير.. توجهت لمنطقة التجمع وركبنا الباص ورجعنا لميامي..

رجعت تقريبا 7 الليل.. دخلت الفندق.. تروشت بدلت وطلعت اتعشى والاختيار وقع على مطعم بحري في شارع ال Ocean drive..

دخلت واستقبلني واحد مع غرشه وبياله وصب لي.. جلست على كرسي الطاوله وطالعت فيه و قلت له: وشو هذا؟ قال هذا كحول من عاداتنا وتقاليدنا اننا نقدمه للاجانب عشان يتعرفون على ثقافتنا... قلت له اييييييه خير ان شاء الله جبه جبه... اول ما لف وجهه وراح يجيب الطلب حقي مسكت بيالته وكبيتها بالزرع هههههههههههه... 

كان اكل جميل جدا.. رجعت ونمت... 

اليوم القبل الاخير في ميامي كان مخصص للبحر ولرحلة بحرية بكروز لجزيرة من الجزر... وكان البرنامج انهم بالطريق يوروننا بيوت اطنخ مطانيخ امريكا وقواربهم وفلوسهم هههههههههههههه.. كانت رحله ممتعه جدا.. كان الكروز مظلم..

الخطه كانت انهم ياخذوننا من ميامي الى الجزيرة بالكروز.. نتعشى ويسوون لنا عروض مسرحيه ويرجعوننا..

طوال الرحله كان يتكلم شخص امريكي كوميدي وكنت اضحك من قلب صراحه وكان يطقطق على المطانيخ ههههههههههههههههههههه الى حين الوصول والنزول... دخلنا وهنا الصدمه...

حسيت اني رجعت الى عام 1900 تقريبا من شدة بساطة الجزيرة... وشدة بساطة الادوات المستخدمه على الرغم من جودتها... عشت لحظات بسيطه وجميله وسعيده جدا.. الناس كثير... الاطفال كثار... الضحكات هنا وهناك.. 

دخلنا على قاعة الاكل الموعوده قبل العرض المسرحي.. جلسنا في طاولات اشبه بطاولات جزر الهنود الحمر.. وبيدت انا اكل الدجاج والاكل البحري فقط.. واستمتعت بكل قضمه.. كان حولي شياب امريكان حبوبين.. قضيت الوجبه بالضحك والسوالف الجميله البسيطه مع هالشياب.. 

الجدير بالذكر ان كان فيه ولد افريقي مع امه يصيح 24 ساعه وبغيت اقوم ادبغه... 

هنا صورة الكروز...

بعد الاكل ابتدت العروض المسرحيه وكان من ضمن العروض.. عرض لممثل كوميدي امريكي شهير (ابو عيون ههههههههههههههه) .. 

وهذي مقاطع منوعة من العروض وركزو على بساطة المكان والضحكات الغير متصنعه 3>... 

اخيراً قضيت اليوم الاخير بالتسوق بشارع لنكن... وقبل رحلة العودة الى كولورادو وتحديدا قبل ذهابي الى التسوق.. كانت الساعه 5 فجرا والنور توه بدا يطلع.. رحت لأحب الاماكن لقلبي واعزها واللي اكن لها عشق جدا كبير.. الشاطئ.. والتقطت صورة الوداع...

تسوقت وتغديت واتجهت للمطار ورجعت لكولورادو في ليلة ايضا كانت مثلجة وباردة جداُ وكان باستقبالي صديقي من جامعة البترول يحيى عسيري.. واخذني للسكن من دنفر الى قولدن.... 

دخلت السكن ونمت نومه عميقة جدا..

صحيت اليوم الثاني الظهر وكانت رحلتي للسعوديه الفجر.. وكنت مرتب اموري وشناطي من قبل.. سويت ترتيبات بسيطه وبديت اودع ولايتي ومدينتي قولدن كونه اخر يوم لي فيها... 

دقت ساعة الصفر وحان موعد الذهاب للمطار.. تأكدت ان كل شيء تمام بالسكن والتقطت هذا الفيديو... 

وهنا لحظة وصولي للاراضي الخليجية بعد تعب جدا شديد في المطارات... المطارات اللي حبيتها كثير.. لانها من اهم الاماكن اللي امارس فيها هواية التأمل... 

وصلت البيت وفاجئوني اهلي بحفلة استقبال وسط بكاء واحضان من امي واختي واخواني الصغار وابوي الله يطول بعمره... وهنا لحظة انتهائي من ترتيب غرفتي ببيتنا... 

وهنا اول سلفي لي مع اخوي الاثرم بعد العوده ههههههههههههههههههههههههههههههه... 

شعور جدا رهيب يوم تشوف اصدقاك واخوياك واهلك واحبابك بعد غيبه استمرت 6 شهور تقريبا..

نعم احبتي 21 ديسمبر هو موعد وصولي للسعودية.. 

وانقضت وانطوت صفحة ديسمبر... 

January 2017

طبعا نظراً لخصوصية غالب الاحداث اللي صارت في يناير بضطر اسوي لها سكيب..

يناير كان لي فيه رحله مع اهلي الى مدينة دبي.. وكانت ايضا هي الاخرى من اجمل الرحلات.. 

اخواني محمد وعبدالرحمن والصغيرة اختي نورا < بالالف مو بالهاء P:

في اواخر يناير رحت للجامعه بعد ما اشتريت اسم للسكن من شخص عشان ارتب الغرفه في سكن البترول وهذا يعني اني سكنت لحالي خلال ترم 162 < واضح العزله اثرت فيه هههههههههههههههه. 

حزمي لامتعتي وذهابي للظهران... 

وهنا الشكل النهائي لغرفتي خلال سمستر 162...

وانقضى ايضا هو الاخر يناير بكل خير ولله الحمد... 

 February 2017 | Term 162

واسم هذا الشهر لا يعني الا شيء واحد!! بداية سمستر 162!! 

 خلونا نتذكر اني توني جاي من امريكا.. النفسيه عال العال ولله الحمد.. كان عندي خيارين لا ثالث لهما.. اما اني اضغط نفسي واتخرج على الخطه (سمستر 172) او اني انزل ساعات خفيفه واتاخر ترم.. 

الوحش ابو عابد قرر يضغط نفسه وينزل 18 ساعه للسمسترات (162 و 171 و 172) ويتخرج.. وسمستر صيف 163 كون للتدريب الصيفي في شركة ارامكو السعودية...

ومثل ماعودتكم, لكل سمستر اهداف معينه احققها, مثلا في 142 كان هدفي مرتبة شرف اولى او ثانية, والحقيقة اني حققت مرتبة شرف ثانية, وسمستر 151 كان سمستر النكبة الحلوه ههههههههههههههه وماكان فيه اهداف معينه صراحه.. سمستر 152 وكان الهدف الراحه وتثبيت المعدل وتقوية العلاقه مع صديقي... 

اهداف هذي السمستر كانت واضحه من البداية وهي كالتالي:

1. تحقيق معدل 3.75/4.00 على الاقل بمرتبة شرف اولى. 

2. الاهتمام ثم الاهتمام ثم الاهتمام بالهدف الاول. 

مثل ماتشوفون, واضحه النيه, معدل عالي ورفع المعدل التراكمي وتحقيق مرتبة شرف اولى اللي دايم اشطفها وماجيبها هههههههههههههههههههههههه..

في ذاك الوقت عبدالله قرر وانتهى الكلام لكن فيه شخص يقول في داخله.. يارجل اتق الله, توك جاي من سمستر في امريكا وكان 9 ساعات فقط والان تبي تدبلها الى 18 ساعة وتبي تجيب 3.75!! لا ومرتبة شرف اولى بعد!!! عز الله انك منت صاحي.. 

رديت عليه وقلت له: على شحم بالله.. 

جا يوم 4 فبراير ومشيت للجامعة.. 

بدا الدوام واستلمت الكتب والتقويم الاكاديمي.. 

كتبت ورى التقويم: It is going to be awesome.... 

هل كانت Awesome او لا؟ نشوف مع نهاية 162...

المواد كانت كالتالي: 

يا ساتر هههههههههههههههههههههههههههههههههه..

وهذا كان جدولي.. ابدا 8 وانتهي 1 وفيه لاب يوم الاحد... 

ابتدى السمستر وكنت اداوم بالمبنى الجديد لكلية هندسة البترول لمواد التخصص... 

الهدف كان قدام عيوني كل يوم من ايام السمستر... حققته ولالا؟ نشوف.. 

الان راح اتكلم بشكل موجز عن كل مادة من المواد... 

PETE304:

المقرر الثاني لهندسة الحفر, اخذته مع نفس الدكتور للمقرر الاول الدكتور المحترم عبدالعزيز الماجد.. الكورس اصعب من اللي قبله واكثف وكان يتكلم عن الـ Pore Pressure وال Fracture Pressure وال Horizontal Drilling وبعض من المواضيع المتقدمه في هندسة الحفر لتخصص هندسة البترول.. الدكتور كان قمه بالاحترام لكن يعيب الكورس الفوضويه كوننا ماكنا ندري وش جالس يصير صراحه كاختبارات ودرجات.. لكن بالنهاية كل شيء عدى على خير.. الكلاس كان ممتع الى منتصف السمستر لكن بعدها الله لا يوريكم... 

PETE303: 

مقرر الـ Well logging.. وهو علم متخصص باستخراج معلومات نمطية عن البئر البترولي على شكل قرافات ومهمتها توصف الامور الحاصله داخل البئر وتساعدنا عشان نقدر كمية الزيت والغاز الطبيعي الموجود في الخزان.. الكورس اخذته مع الدكتور محمد محمود وهو الاخر كان قمه بالاحترام والطيبه وكلاسه كان من اهم كلاسات السمستر... 

IAS301:

المقرر الاخير للغة العربية مع الدكتور خالد التويجري.. الدكتور هذا غامض جدا وماحصلت لي معاه مواقف ولا اي شيء.. كان مرح وفكاهي ورجل فاهم ومحترم ايضا وصاحب رأي سديد وتحس انه فاهم جدا.. 

ENGL214:

خلال دراستي في سمستر 161 تحديدا في امريكا ارسلت ايميل للمدرس اللي درسني ENGL101 و ENGL102 اللي هو Anthony Gibson... وسألته هل راح تدرس 214 في 162 او لا.. (الرجال قايل في سمستر 142 ان 161 اخر سمستر له وبيتقاعد وبيعيش في اسبانيا) لكنه رد علي وفاجئني بأنه راح يدرس الكورس في 162 وما كان عندي شيء اسويه وقت ماستقبلت هذا الخبر غير القفززززز فرحا هههههههههههههههه..

الكورس مثل مانتم عارفين انه بروفيشنال.. يتكلم عن امور الوظيفه وايضا فيه ريبورت اعقد من ريبورت 102.. 

بالبداية (أول اسبوع طلب مننا نختار موضوع وكان الثيم عن اوروبا, اي شيء عن اوروبا) وبكل سذاجه اخترت الموضوع التالي:

Decarbonization process in the Power Sector in Europe 

ليش قلت سذاجه, لان الموضوع جدا كبير وماقدرت اتحمله وغيرته الى الموضوع هذا:

Electric Vehicles in as a Solution to Harmful Emissions in Europe 

برضه كان موضوع ماله دخل بتخصصي وماعجبني وغيرته اخيرا للموضوع الخرافي:

Brexit and its Impact on the United Kingdom's Economy 

واعجب جبسون بشكل جدا فضيع وقال لي بالحرف الواحد: "It is a brave choice and if you handle it well it is going to be something........ GREAT!" 

كنت الوحيد بالسمستر اللي كتب عن الخروج البريطاني من الاتحاد الاوروبي واثاره على اقتصاد بريطانيا.. 

للي حاب يقرأ الريبورت يتفضل هنا.... https://www.dropbox.com/s/gp3nhnzmjcpm04p/Brexit%20Report.docx?dl=0

النتايج بتكلم عنها بعدين... 

الكورس بشكل عام سهل وممتع...

وداعا جبسون وداعا يا من كنت سبب كبير جدا لاستعادتي ثقتي بنفسي في سمستر 141... شكرا واوقات سعيده في اسبانيا ايها التشلساوي المتغطرس.... 

CHE204:

Fluid Mechanics وهو كورس مكرر بالنسبة لي كوني اخذته من قبل وكان كورس جدا ممتع مع الدكتور عمر زاهد.. 

GEOL318:

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه!   

وبكذا نكون تكلمنا وانتهينا من المواد اللي اخذتها خلال هالفصل الدراسي... 

وهذي صورتين من شهر فبراير... 

خلال فبراير انا وصديقي عبدالعزيز طحنا طيحه بالهافمون ودايم كنا نروح ناكل اسكريم ونشرب شاهي وناكل حب ونتكي على البحر.... حبيبي ابو العز ههههههههههههههههههههه...

وانتهى شهر فبراير ولله الحمد.... 

March 2017

شوفوا نظرتي لشهر مارس هههههههههههههههه... 

لا شيء مميز في هذا الشهر سوا يوم 20 مارس والسبب ماقدر اقوله P; 

لكن ابرز الاحداث كانت مياجر 1 اللي بكل صراحه طمنتني على هدفي اللي حطيته وكنها تقول لي: "كمل ياعبدالله والله يمديك!!"

نتائج ميجر 1 لكل مادة:

وحصلت بفضل الله ومنته على A في ميدتيرم الانجلش 214...

وبالطبع كان مارس اغلبه دوام وحل هوموركات وكوني منزل 18 كنت في ضغط جدا رهيب! 

الفيديو هذا كان في 15 مارس وكنت اصور في كلاس هندسة الحفر وكنا ننتظر الدكتور يجي ههههههههههه..

وهنا دكتور الجيولوجي كان متاخر 25 دقيقه واقول للشباب قوموا نمشي خلاص!!! هههههههههههههه

في 17 مارس صار حدث مهم وهو ان فيه شخص يقرأ مدونتي ويتابعني طلب يقابلني.. اتفقنا نتقابل بالمول واقولها وبكل فخر ايه نعم قابلته وجلسنا جلسه نقاشيه جدا جميله.. وانتهت بإهداءه لي هذا الكتاب اللي استخدمته في مقرر IAS301 يوم طلب مننا الدكتور تلخيص كتاب.. 

شكرا عزيز وشكرا على مقابلتك الجميله وثقافتك الواسعه واسال الله ان يحقق احلامك كلها... 

انتهى مارس بخيره الغالب على شره ولله الحمد... 

April 2017

شهر كان مليان تأمل! كنت اكتب كثير, اكتب بكل مكان! اقرا لنزار قباني بشكل فضيع! ما ادري وش السبب لكن وقعت في غرام كلمات هذا الرجل الله يرحمه.. جميل كنت يا ابريل! 

في هذا الشهر وتحديدا 15 ابريل ابتديت كتابة ريبورت الانجلش 214 بجديه وبديت اجمع السورسات والامور هذي... 

وانتهى هذا الشهر بضغط هوموركات وريبورتات رهيب جدا جدا!! 

May 2017 

مثل ماتشوفون وصلنا مايو! واقتربت نهاية هالسمستر الجميل! وهالفترة الجميله! 

في هذا الشهر انتهينا من مياجر 2 كلها وكانت نتايجها لا تقل روعه عن مياجر1 والكلمه اللي استقبلتها من هذي النتايج هي: "يابوعابد ركز بالفاينلات وخلاص مابقى شيء على هدفك!!!!" 

وفي ليلة كنت متضايق فيها من ضغط الواجبات والكوزات والمياجر! .. اتصلت على ابوي الله يحفظه وقلت له بالحرف الواحد: "يبه عندي لك مفاجأه اخر هالترم". فرح ابوي وقال لي الله يوفقك ويفتح عليك وحتى ماسألني وش هي او حتى ناقشني فيها..

سكرت من الوالد وفتحت تويتر وشفت ان الناس بدو في فترة مطالبات تقديم الاختبارات قبل شهر رمضان المبارك وحسيت بالخطر!

راح اعلمكم وش هو الخطر بس خلوني اقول لكم ان في 2 May بدينا نكتب درافت الانجلش 214 ولكم ان تتخيلو حجم الضغط وقرب الفاينلات... 

الخطر اللي كنت اتكلم عنه هو ان كل ماده عندي في هالسمستر عدى الفلويد والعربي كان فيها بروجكت!!!! وكل البروجكتات تقريبا تتطلب سوفتوير وتكيات في اللاب!

ولاحظت مطالبات الشعب السعودي الفاضل بتقديم الاختبارات لذلك حسيت بالنكبه وقلت لازم ياعبدالله تشتغل من الان وتخلص!

وفعلاً, بفضل الله عز وجل سلمت جميع مشاريعي في تاريخ 12 مايو تحديدا قبل بداية فاينلاتي بسبع ايام ولله الحمد والمنه وتفرغت للمذاكرة لجميع الاختبارات.. 

كنت متقدم في كتابة ريبورت الانجلش عن كتابة الدرافتات وسلمته في تاريخ مبكر جدا! 

نتائج ENGL214:

الريبورت: A+

اللتر (الرساله): B+

البرزنتيشن: A+

الميدتيرم: A+

الفاينل: A+

المقابلة الشخصية والسيرة الذاتية: A+

الفاينل قريد: A+

اللهم لك الحمد! 

فترة الفاينلات:

كانت جدا مضغوطه وتعبت فيها كثير لكن تيسرت ولله الحمد.. 

والان! هل حققت الهدف او لا! 

كلنا ندري ان الاصرار والعناد هو مفتاح الاهداف! بعد توفيق الله سبحانه طبعا! 

عبدالله كان انسان جامد امام هالسمستر القوي والصعب! 18 ساعه ماكانت سهله ابدا! لكن كنت انا اصعب منها! 

عاندت وقاتلت بكل اسلحتي.. ابي احقق هالهدف على الرغم من قساوته وقساوة الظروف وتقديم الاختبارات الا اني اصريت على مرتبة الشرف الاولى! نعم احبتي... حققتها ولله الحمد وبكل فخر... 

وأخيرا خضعتي! 

وَأَعْلَنَ في الْكَوْنِ أَنَّ الطُّمُوحَ لَهِيبُ الْحَيَـاةِ وَرُوحُ الظَّفَـر
إِذَا طَمَحَتْ لِلْحَيَاةِ النُّفُوسُ فَلا بُدَّ أَنْ يَسْتَجِيبَ الْقَـدَرْ

شيء مهم جدا لاحظته:

خلال سنوات دراستي.. كنت لما ينتهي السمستر تصير فيه اثار جانبيه! مثلا 152 كان الاثر الجانبي هو النفسيه التالفه! وفي 142 كان وزني وجسمي اثر جانبي سلبي نتيجة السمستر هذاك... هالسمستر هذا مع كل عيوبه وقساوته وصعوبته الا انه افضل سمستر لي بالجامعه وافضل معدل حققته وبالاضافة الى ان وزني مثلا نزل بدال مايزيد!! 

لذلك عزيزي الطالب.. مع تقدمك بالسنوات راح تلاحظ انك كل سمستر تتغلب على عيوب السمستر اللي قبله وتتطور وتتحسن وتتفادا اشياء كثير.. لا تزعل من الامور الجديده اللي تجد في حياتك وتعتبر سلبيه بالعكس.. خل عندك ايمان قوي بأن تجاربك بالحياة بتستمر.. والاشياء السلبيه بتطلع وبتظهر وكلنا ندري بهالشيء.. المشكله مو هنا... المشكله كيف راح تتعامل معها وهل راح تكررها؟

نفسك عليها حق عليك! وحقها هو انك ترضيها بأحلامك اللي فكرت يوم من الايام انك تحققها! وظيفية, اسريه, ماليه, شخصية, ايا كان! 

الدنيا دقائق وثواني.. لا تتقاعس يوم من الايام بتحقيق شيء نفسك فيه! انتبه! كل شيء بتقدر عليه بالتخطيط والتنظيم والاصرار! وثقتك بربك قبل هذا كله.. 

وحط الف خط على التخطيط.. لاحظ يوم اني شفت ان الشعب يبي يقدم الاختبارات وش سويت؟ رحت وخلصت كل المشاريع اللي عندي.. وبالمقابل طلاب كثير انتكبو وجلسوا يسوون البروجكتات الى اخر يوم بالسمستر ولا حصل لهم وقت يذاكرون للفاينلات! 

كل شيء بالتخطيط والاصرار والعناد يخضع!

عَـلَى قَـدْرِ أَهـلِ العَـزمِ تَأتِي العَزائِمُ ... و تَــأتِي عَـلَى قَـدْرِ الكِـرامِ المَكـارِمُ 
و تَعظُـمُ فـي عَيـنِ الصّغِـيرِ صِغارُها ... و تَصغُـر فـي عَيـنِ العَظِيـمِ العَظـائِمُ

الجديد:

سمستر 163 راح يكون تدريبي الصيفي في شركة ارامكو السعودية ويبدأ في 2 جولاي بأذن الله.. 

راح تكون فيه حلقة كامله مخصصه عن هالتجربة اللي متحمس لها بشكل جدا عظيم.. 

لا تنسى اللي قلته لك ببداية الحلقة هذي!!!! روح للرابط اللي حطيته لك فوق.... 

الى ذلك الحين, دمتم كما تحبون!

حساباتي في مواقع التواصل: 

Instagram: 3bmi < فيه صور كثير لسفراتي...

Twitter: Eng3b