مذكرات ويوميات جامعية (7)

بسم الله الرحمن الرحيم,
السلام عليكم ورحمة الله وبركاتة,

قبل ما أقول أي شيء احب اوضح ان عندي مشكله مزمنه مع التاء المربوطه, العلاقات متوتره بيني وبينا هالفتره لذلك ماراح تشوفونها كثير .

اسعد الله اوقاتكم بكل خير جميعاً, اتمنى انكم مستمتعين بالعطله, الى الان, واحب انبه اني رجعت الى اراضي البلاد الجميله وها أنا جالس قدام سوني 4 احلل FIFA وبعض من الالعاب اللواتي قد خططت مسبقا في 151 ان العبها , كانت رحلتي جميله جدا لدبي, اكلت كثير .

اخر شيء تكلمنا عنه 142 وكيف كان سمستر جميل وسمستر تغيير مفاهيم بحت, اصبح المعدل العالي ليس الا اتخاذ قرار, امور شخصيه كثيره تغيرت جذريا في ذاك السمستر وانا مبسوط من هذا الشيء. 

في السمستر اللي بتكلم عنه اليوم, سمستر النكبه الحلوه , اللي صراحه مدري ليه سميته كذا لكن اتوقع راح يبان ليه مع نهاية هالفصل من المذكرات, اكتشفت في بداية او قبيل بداية السمستر ان ماحولي احد شششيت, فعلا مافيه احد, اقصد في الجامعه!! اوكيه عندي روميت وبعدين؟ شفت اني افتقد بشكل قوي جداً للصديق الصدوق الصادق الوعد المنصف < الرجال بدا يهرول بعيد, عشان اكون صادق, كان فعلا هناك صديق جدا عزيز علي لكن ما أحس اني كنت معطي ذيك العلاقه حقها, لذلك قررت في 151 اني اعزز علاقتي مع الصديق اللي بتكلم عنه اثناء هالمذكرات في هالسمستر الممتاز الى حد ما. 

اعترف اعتراف تام ان السمستر هذا كان مخاطره من نوع جدا وصخ , خاطرت ونزلت 17 ساعه لكن مو مثل سابقتها 141! كانت مواد جدا جدا جدا ثقيله! راح نستعرض المواد بعد شوي لكن خلوني اذكركم بالمبدأ حقي اللي في اوائل المذكرات, كنت اقول اني ممتاز تحت الضغط وابدع تحت الساعات الكثيره وشفت اني لما انزل 17 ساعه اكون مهتم اكثر, لكن في 142 نزلت 15 ساعه بس ولو تتذكرون اني حصلت على معدل +3.6!! يعني الان اقدر اقول ان ماعندي مشكله لو نزلت 15 او 17 لأني ما اشوف الفرق جدا كبير.

بالمناسبه, سمستر 152 (السمستر الجاي, لسه ما درسته) كنت ناوي انزل 19 ساعه, لاني اكتشفت فعلا ان الضغط مو بعدد الساعات كثر ماتكون معرفتك الحقيقه بحقيقه تلك المواد وقد ايش صعبه! وهل فعلا ال 19 ساعه هذي تعبر عن ما بداخلها او لا.

على سبيل المثال, سمستر 141 كان 17 ساعه لكن كانت ولا شيء مقارنه ب 151 اللي هو برضه 17 ساعه!!, 151 كان جحيم. 

عشان اوضح الموضوع بشكل اكبر, 151 كان خليط بين مجموعة مواد من مختلف اقسام التخصصات الجامعيه وكانت كلها كورسات تأسيسيه وقويه!! لذلك كان سمستر جداً شاق.

السبب بأني خاطرت هذي المخاطره الوصخه, بأني مخطط اطلع exchange (ابتعاث من الجامعه لمدة سمستر كامل في احدى جامعات امريكا) وكانت شروطهم للبرنامج هالسنه ان يكون معدلك 3+ وانك تكون حاصل على درجة في اختبار التوفل تعادل 67/120, حققت الشروط ولله الحمد وبخصص حلقه ان شاء الله احكي فيها عن البرنامج لكن بعد ما ارجع (بعد 6-9 اشهر او شي مثل كذا).

وعشان اطلع هالبرنامج لازم اضغط على نفسي شوي وانزل ساعات كثيره لان مو مضمون لي احصل كل المواد اللي ابيها في امريكا واخاف اجيب العيد! لذلك اتمنى يكون سبب ال 17 ساعه في سمستر 151 و 152 (الجاي) واضح.

قبل ما أبدا استعراض مواد سمستر 151 احب أذكركم ان كان هدفي في هالسمستر 151 اني اعزز علاقتي مع صديقي اللي دايم معه + احافظ على المعدل أو أرفعه, ماكان طموحي ارفعه كثير لكن كان الهدف والاساس انه ماينزل, وكثير ممكن يسأل وينقد ليش كان تفكيرك كذا؟ والجواب ان هذا بسبب ارهاقي في سمستر 143 (الصيف) مع الفيزكس 102, وأحب أأجل الحديث عن هالماده لوقت ثاني مناسب, وخلووووونا نشوف هل حققت هالاهداف او لا!!!.

بسم الله نستعرض المواد؟



واضح انه نار؟ ههههههههههههههههههههههههههههههههههههه, اشهد بالله انه طلع بي الشيب! 



الق نظره عزيزي القارئ على اللابات الثلاثه المنسدحه تحت .

بسم الله نبدا ماده ماده؟

EE204: مقدمه في الدوائر الكهربائية.

كورس تأسيسي في علم تخصص الهندسة الكهربائية, يشرح الكهرب في الحالتين dc, ac, التيار المباشر والتيار المتردد, الكورس بكل أمانه يصنف من الكورسات السهله جدا, ولكن وفقا لتعسف واستهبال القسم الارعن واسئلة اختباراته المدري وش تبي, اصنفه من الكورسات الثقيله, درسني الكورس الاستاذ الرائع عبدالله البتال صاحب اللغه الساحره, انسان جدا محترف وملتزم ومخلص في عمله وشرحه, كنت استمتع في كلاسه, هو ايضا من الدكاتره الكثر اللي كانو يصنفوني من الطلاب ال "Very good" على حسب قوله ذات يوم واحب ايضا اشكره وكنت مبسوط من هالشيء, الكورس كان فيه ميجرين وكويزات وفاينل ولاب, اللاب كان ممتع جدا وكنت مستمتع فيه واتذكر اخذت فيه 19/20 وكانت اول مره اخذ هالدرجه في لاب! اتذكر اول ميجر لي في هالماده استعديت استعداد قوي جدا جدا جدا, كان الاختبار الاول فعلا صعب وطويل وكان الوقت غدار, لكن كنت اتوقع اني مبدع! اتذكر بعد الميجر بكم يوم سافرت للديره ورحت بيتنا  وشغلت فيفا واتصلت على واحد من العيال قلت له "تجي افقع وجهك؟" قال: "قدام", سويت لخويي انفايت (دعوه) عشان العب معه وهذا اللي كنت اتذكره بس , لان سمعت صوت الايميل يرنرن كالعصفور, فتحت الايميل الا واشوف الاخ عبدالله البتال مرسل الدرجات!!!!!! واكتشفت اني لا "فقعت وجه" خويي في فيفا ولا هو "فقع وجهي" اكتشفت ان الدكتور اللي فقع وجهي بدرجة 60/100 في الميجر اللي كنت معتبر نفسي فيه مبدع!!!! جلست اكلم نفسي واقول "يخوي وش سالفتك انت مع ميجر 1؟" الى متى الطعات هذي؟ كنت متعقد من 142 وكنت ما ابغى احط نفسي في مواقف سيئه وقت الفاينلات واتعب مثل ماتعبت في 142, قلت الحمد لله وعدى المووضوع وجا ميجر 2 وقدني عارف حركاتهم الوصخه والحمد لله جبت فيه اتذكر 80/100 وكانت درجة مقنعه لما اجي اشوف الظلم بالتصحيح! الكويزات كنت الله حق ادخل على الله ثم على فهمي في الكلاس وكنت الحمد لله ابدع واجيب درجات ممتازه واخذت درجة طيبه جدا جدا في الكلاس وورك, الفاينل بتكلم عنه في اخر المذكرات, كورس متعب؟ غثيث؟ ايه لكن الحمد لله عدى وافتكيت منه وبنفس الوقت لازم أقدر واحترم الجزء اللي استمتعت فيه, شكرا عبدالله البتال, شكرا KFUPM على هالكورس.

GEOL201: مقرر علم الارض
مع ان تخصصي ماله علاقه كبيره جداً بعلم الارض الا أني أٌرغمت اخذ هالكورس المخيس المعفن, انا انسان من صغري ما أحب احفظ وهنا عاد لازم تشغل الهاردسك اللي براسك, من الرغم من غثاثة مادة الدواير الكهربائيه الا اني حبيتها اكثر من علم الارض! درستها مع مكس من المدرسين, اللاب كان فيها "شششششبه" ممتع وطلعت منها بقريد اقل من حقي لكن الحمد لله قريد ممتاز.

IAS212: اخلاقيات المهنه في الاسلام.
مع الدكتور والاستاذ والمربي والأب عبدالرحمن الخالدي, حبيبي هالدكتور, كلاسه جدا ممتع ويخلص بسرعه, كان مشهور بمقولة "نشرح الدرس وعلى طول نطلع", كان يكرر جملة "فهمتم احبابي؟" كثير وكنت ارسم خطوط شبيهه بخطوط مستويات الزومبي في بلاك اوبس 1 و 2 و كود 5 بعدد مرات قوله لهالكلمه وكنت اطلع بعدد لا بأس به , اول ما دخل علينا عطانا بونص ودرجات زياده اعتقد طلابه يعرفون عنها  والحمد لله كان كورس جدا رائع ومفيد مهنياً واخلاقياً وماقصر مع الكل اخر السمستر.

MATH201: Calculus III.

مقرر الرياضيات الخامس لي في الجامعه وكنت اسمع هالجمله دايم "اسسهل كورس بيمر عليك في الجامعه", "كورس اسهل من الاسلامي", لكن كان من اصعب الكورسات بالنسبه لي في الجامعه والفضل يعود للمدرس اللي مابي اذكر اسمه لكن اكتفي بقول:

( الأرواح جنود مجندة فما تعارف منها ائتلف و ما تناكر منها اختلف )

طريقة شرح وشخصية الدكتور جدا ماراقت لي وكرهتني في الكورس, لكن ماكان هذا عذر اني ما اكسر خشم الاداره اللي كانت تحط الاسئله في الفاينل ههههههههههههه, كورس استمتعت فيه بالنهايه لما وصلنا للتكامل (لعبتي), لكن نقول كورس للنسيان.

انتو لو تشوفون خط الدكتور بالسبوره وكيف ياكل الحروف اكل وهو يتكلم! اقسم بالله مو اسلوب دكتور وودي اشوف اللي معطيه الدكتوراه عشان اتفاهم معه بطريقتي, لكن احقاقاً للحق, الانسان جدا طيب وخلوق والله يوفقه وين مايروح.

ME203: الديناميكا الحراريه. 

اه يابعد عمري يالثيرمو! الماده اللي كنت مستمتع فيها من اول كلاس واول ثانيه الى اخر ثانيه, واللي خلتني افكر احول هندسة ميكانيكيه بكل جديه, لكن هونت يوم شفت كورس ال 210 هههههههههههههههههههههههه!, اخذتها مع الدكتور النشمي محمد بن شايع القحطاني, سبق وان قيمت الدكتور في موضوع التقاييم, الماده هذي كنت فيها بيرفكت من اول كويز مروراً بالمياجر الى الفاينل واتذكر كان مجموعي في هالماده اكثر من الاسلامي (99 تقريبا), وهنا نذكر قول الشاعر في الحب: 

يا أيها الدنِف المُعذَّب بالهوى! ... إني بأحوال الهوى لعليمُ
الحب صاحبه يبيت مُسهَّداً، ... ويطير عنه فؤاده، ويهيم
الحب داءٌ قد تضمّن في الحشا ... بين الجوانح والضلوع مقيمُ
الحب لا يخفى، وإن أخفيته، ... إن البكاء على المُحبّ نَموم
الحب فيه حلاوةٌ ومَرارةٌ، ... والحب فيه شقاوةٌ ونعيم
الحب أهون ما يكون مُبرِّحٌ، ... والحب أصغر ما يكون عظيم.

وداعاً ياثيرمو وداعاً ياحبيبتي!

السبب في حبي لهالماده مو عشان الدرجات والله العظيم! ولا عشان مستواي القوي فيها, الموضوع ومافيه انها كانت ماده ماتلف وتدور معك, افهمني وبتحل لو كانت الاسئله من مدغشقر.

PETE203: هندسة الحفر.

ثاني كورس لي في تخصصي هندسة البترول! لم يختلف عن سابقه الثيرمو, استمتاعي في هالكورس كان مثل الثيرمو ويمكن اكثر على الرغم من تخبط الدكتور معانا كونه انقطع عن التعليم فتره ليست بالبسيطه لكن كان كورس ممتع! اللاب كان مع الثنائي المرح, عبدالصمد و محمد علي, فأما عبدالصمد الافريقي فكان معروف بمقولته الشهيره "وات ايز ديس؟ يور ار ان اينجينيه", اما صاحبه محمد علي فأتسم بالجديه المنقطعة النظير, اخذت في هالكورس A+ ولكم أن تتخيلو كمية الجهد اللتي بذلتها في سبيل الحصول على هالقريد الارعن .

انتهينا من المواد!
نجي الان لفترة الفاينلات ونشوف وش صار! 

الفاينلات (النهائيات):
كان هدفي مثل ما قلت لكم اني اعزز علاقتي مع صديقي ابو العز, وبنفس الوقت انتبه للمعدل واحاول احافظ عليه عشان ماينزل, كان الهدف تثبيت المعدل ولكن الرؤيه كانت اني ارفعه بلا شك, فأما علاقتي مع صديقي فتطورت ولله الحمد, كنت حريص كل الحرص اني اذاكر معه وقت الفاينلات, كانت ايامي معه اشبه بالاحلام, كنت مبسوط بكل لحظه كنا فيها مع بعض, اتذكر واتصور كل شيء سويناه ودرسناه وتعلمناه في مبنى 7 في الغرفه الكبيره ذات الطاولات الدائريه, اتذكر الفرحه والضحك لما اكتشفنا ان فيه كلاس ماحد يدري عنه في مبنى 7, اتذكر الاغاني المخيسه اللي فصل عليها ابو العز وكان يشغلها وماكنت ادري وش يحس فيه لكن كان اختبار ال ce وقتها ضارب في عقله, اتذكر يوم طلبنا من ماك وجلسنا نتعازم على من يروح يجيب الاكل من عند البرج من الفلبيني وبعد طول نقاش وهواش, اتفقنا على اننا نروح كلنا نجيبه! :d في وسط سبات وشتائم بريئه من الاخ ابو العز, كنت قبلها حصل لي موقف معه هذا الشخص الارعن في اخر كلاس الماث لكن مثلت على انه شيء لم يكن وماحبيت اخسره كصديق بسبب موقف تافه, متاكد ان مافيه احد فيكم ولا هو نفسه يحس بحجم الفرحه لما اكون معه, ما اتوقع يعرف حجم الفخر اللي احس فيه لما يجي ويستشيرني او يسألني عن شيء او يشكيلي عن ماده او عن دكتور او عن اي شيء, شكرا ايها الصديق الجميل.

اما عن الجانب الاكاديمي! فقد حصلت على نتايج والله مدري كيف جت لكن كانت نتاج تعب وكررررررف الفاينلات كالعاده, حصلت على معدل ليس بالبعيد عن 142 ولله الحمد, وارتفع المعدل التراكمي ارتفاع ليس بالسيء ان جاز لنا الوصف, واعتقد اني عززت علاقتي مع صديقي تعزيز ليس بالقليل ان جاز لي التقدير.

شكراً ابو العز مره اخرى وشكراً لي انا على الجهد الرهيب اخر الترم وشكرا لك يالله قبل كل هذا على توفيقك وكل هذا من الله والحمد لله.

سمستر 151 كان شاق ومتعب وكاد ان يبكيني, لكن افرحني كثير وابكاني فرحاً ايضاً!!! كل هالمواقف وكل هالامور اللي صارت اضافت لمخزون المبادئ عندي اشياء جديده مره اخرى واهمها:

1. مهما كان مدرسك سيء, لا تاخذ هذا عذر للأهمال والتسويف.
2. الدنيا قصيره جداً, سامح واصفح وتقرب لأصدقائك وبين لهم قد ايش هم مهمين في حياتك.
3. تعبك طول السمستر بييتحدد بعد توفيق الله ثم الثلاث ساعات حقت كل فاينل من كل كورس في السمستر, الفاينل هو الفيصل.
4. الدنيا ارزاق ومقسمها رب العباد.

هذا اللي عندي هالليله, واحب اقول ان الحلقه الجايه عن سمستر 152 اللي بيبدا يوم الاحد الجاي, لذلك المذكرات الجايه بتكون منوعه وماراح تكون عن سمستر معين, ممكن تكون يوميات اثناء السمستر.

الحلقه الجايه ابرجع اتكلم عن السمستر الصيفي 143 (فيزكس 102) ووش صار فيه,
الى ذلك الحين,
دمتم سالمين.