بسم الله الرحمن الرحيم,
السلام عليكم ورحمة الله وبركاته,
نعم نعم نعم احبتي, انني جالس اتقضى اجازتي في دبي العريقه
, بعد سمستر والله اشبه بالمدري وش ههههههههههههههههه ! كان سمستر ناري, 6 فاينلات ومياجر على اخر اسبوع! وثلاث لابات! وشششش يبوي ! المهم انا جالس اكتب الان من وسط الفندق في مدينة دبي في الامارات العربية المتحدة, وبأذن الله اليوم بكتب عن 142 ووش صار فيه من تحديات ومواقف وحتى المعدل والقريدات بتكلم عنها لاني مبسوط من هالترم بشكل جدا رهيب!
خلوني ادخل مدخل قبل ما ابدا المذكرات والقصة كاملة:
قبل بداية الترم كنت معاهد نفسي اجيب مرتبة شرف اولى او ثانية, وكنت اقول:
وعد ٍعلى الحرّ الذي مثلي ترى معناه دين
حتى لو بالتعب والبهذلة لأعلمك من هو أنا !(*)
طبعا مرتبة شرف ثانية او اولى يعتبر معدل فوق ال 3.5 من 4 وهي شيء صراحة ماهو بالبسيط, لكن عموماً عاهدت نفسي اجيبها, جبتها او ماجبتها نشوف اخر هالتشابتر.
نستعرض المواد؟
طبعاً السمستر هذا كان 15 ساعه, كانت مناسبة حيل وكنت عامل حساب الفيزكس 102 في الصيف (مقرر الفزياء الثاني والاخير في الجامعه اخذته في الصيف 143), لذلك ماحبيت ارهق نفسي ب 17 ساعه وانا عندي فيزكس 4 ساعات في الصيف, حبيت السمستر يكون خفيف.
قبل ما ابدا < كأنه طولها ؟
, احب اتكلم عن شيء مهم جدا, كثير مننا في هالدنيا يحب يكون شيء, مهندس, دكتور, سباك, طيار, عامل نظافة, وللأسف في مجتمعنا الشخص اول شيء يفكر فيه الناس ووش بيقولون وهل بيدعمونه ولالا ! وللأسف اكثر, اراء بعض من الناس تأثر بشكل سلبي بطريقة او بأخرى تخليك تثني عن قرارات واحلام كثيره, لذلك عزيزي الطموح, اذا نويت تسوي شيء (جيد) كطموح وظيفي او دراسي او رياضي او اي شيء, لا تعلم احد ابداً لما خلاص تكون بديت وحققت جزء كبير منه, ما أقصد العين (وهي حق) لكن اقصد الاراء والتعليقات المخيسه اللي ممكن تستقبلها من بعض الناس وممكن تكون سبب قوي جداً في عدولك عن بعض هالاحلام والقرارات المصيريه في حياتك, اعطيك مثال؟ طيب, اول ماتخرجت من السنة التحضيرية, اتذكر الموقف هذا مثل ما اتذكر اسمي, كنت امشي مع شخص في المباني الاكاديميه وكان يشتكي ويتكلم عن المعدلات وان الجامعه ظالمه وان طلاب الجامعة معدلاتهم تتراوح بين 2.5 - 3 !!!!!! مع كل أسف, تكونت هالفكره السلبيه في داخلي وفعلاً كان تفكيري ان مايجيب 3.6+ الا العبقري اللي جاي من بلوتو ! 
لذلك هالكلام كله تغير في 142 (سمستر الابداع), فعلا كانت النتائج مبهره وغير متوقعه, لكن خلونا نتذكر انه كان هدفي مرتبة شرف ثانيه او اولى, يلا بسم الله نبدأ ونشوف وش صار!-----
Chem101:
اول مقرر في علم الكيمياء الجميل مع الدكتور المحترم الهادئ عبدالرحمن البيطار, دكتور حبوب وطيب وكلاسه خفيف وشرحه كان متواضع, كان دايم ينظر لي بنظرة الطالب المميز وكان هالشيء يفرحني دايم, كنت مبدع في كويزاته ومستواي معاه ممتاز الى ان جا ميجر 1
!!! اتذكر اني كنت مستعد لهالاختبار استعداد ممتاز وكنت داخل بثقه وكان كلي طموح اني اجندل الاسئله واحد ورى الثاني واطلع, لكن للأسف جندلتني الاسئلة بكفوف كل واحد اقوى من الثاني ! حاولت احل اللي اقدر عليه وطلعت وكانت الدرجه 60/100 -_- ! وتف؟ وش صار؟ مدري! عموما جلست اكلم نفسي واقول ايه بالله انها بداية مبشرة بمرتبة شرف ثانيه بالريوس ! كملت لما جا ميجر 2 ودخلت وقلت يولللللد لازم تعدل! الوضع كذا بيض منتهي تاريخه! وقلت بسم الله وبديت احل, جاني اول سؤال خلاني ارفع وجهي من الورقه وادور الكوردنيتور (مشرف المادة) واطالعه في نص عيونه واقول في خاطري افتكو لحيك بلا افتكو لحيك بلا افتكو خشك 
!! جلطني! ماعرفت احله ورحت للي بعده لما خلصت الاختبار واكتشف بعدين اني جايب 55, من بعد هالاختبار تدهور مستواي بالماده وصرت ما أهتم! عادي اطنش الكويزات قلت بس ابي اطلع باللي هي به , قربت الفاينلات واللي بكتب عنها في جزء خاص في هالفصل من المذكرات.Engl102:
مررررررررة ثانية مع الجججججججميل Anthony gibson, الكورس كان عن مهارات كتابة التقرير الاكاديمي, نفس الاستاذ اللي درسني 101, شافني في الكلاس وطلعت عيونه وانبسط في نفس الوقت
, الكورس كان سهل واسهل من 101 صراحه, اتذكر في الميدتيرم جبت B+, والريبورت A+ اللي كان عن حلول الازدحام في الرياض وكان مفيد جدا قبل مايكون هدف للقريد او النجاح, والبرزنتيشن A+ اللي ابهر الدكتور وجاني بعد ما خلصت وقال لي "It was magnificent,well done", كان كورس ممتع فعلاً! IAS111:
مقرر الاسلامي الاول, الايمان واثبات وجود الله عز وجل, كان الكورس مع الاستاذ القدير المحترم عبدالرحمن السعدي, كلاسه قمه في المتعه والانسجام والروحانيه, ماقصر معانا في اخر السمستر.
Math102:
مقرر الرياضيات الثاني (كلاكولاس) وكان يتكلم عن التكامل بشكل خاص, كان مع الشاب الخلوق مؤنس ملولي, صاحب اللغه الخلابه والاسلوب الجذاب, لكن كان الكلاس روتيني ومليت اخر الترم بكل صراحه,كان يقول لنا انتم كطلاب افضل من طلاب امريكا بكثير (كونه درس هناك طول عمره) واتذكر مره من المرات كان يشرح نقطه في موضوع معين وكان يتكلم عن تكامل طول المنحنى, بعدها دخل على مساحة السطح ورفعت يدي بعد ما جاتني فكره (الموضوع جديد اصلا فكانت رفعة يدي اجتهاد) قلت له مساحة السطح مجموع كل المواضيع اللي خذناها, قلت له بالحرف "It's a combination" قال: "Wow! a combination!!!!! see guys? your much more better than americans"
, اول ميجر ماكان بعيد عن صاحبه الكيمياء جبت فيه 55!!!!!!!, وثاني ميجر اعتقد كان السبب في نقطة التحول وجبت فيه 90 والفاينل مثل ماقلت راح اتكلم عنه في النهايه, طبعا اتذكر اني رحت للاستاذ في الساعات المكتبيه اخر الترم وقلت له بالحرف "ايش هو الماكسمم قريد اللي اقدر اجيبه بهالدرجات واوعدك اجيبه" لانه كان متأمل فيني وكان يعتبرني من افضل طلاب الكلاس, عطاني كامل في اعمال السنه وكان ينتظر مني اداء كويس في الفاينل اللي مره ثانيه راح اتكلم عنه تحت.PE102:
ثاني مقرر رياضه في الجبل, وكان مع الفلاوي علي عبيد في كلاس تنزيل الوزن (كان وزني مرتفع شويات وقتها) طبعا الكل كان اسمن مني بكثيييييييييييير ويقولون لي وش دخلك معنا, وكان ردي ابتسامه, عموما كان المطلوب مننا ننزل 5 كيلو ونزلت له 8 وعطاني A+.
[U]PETE201:
اول مقرر هندسة بتروليه
, كان مع وحش القسم "حسن الهاشم", كنت كالعاده اتكي قدام ومجتهد واحاول قد ما أقدر اتميز في الواجبات والتقارير والاختبارات وكان معجب بأدائي ومره من المرات كان يقرا في احد التقارير اللي سويتها تطوعياً مني وحب للمعرفه, يوم خلص رفع راسه وقال "الله يوفقك يعني والله مدري وش اقول", الى اليوم يشوفني ويبتسم, طبعا انا منحاش منه كل مواده حاطهم EXCHANGE لانه فعلا دكتور كريف.وبسسسسس هذي كل المواد, الان نجي فترة الفاينلات والحصاد..
الفاينلات (النهائيات):
مثل ما قلت لكم فوق ان ال 90 في الميجر الثاني في الماث كانت هي السبب بعد الله في رجوعي على المسار الصحيح وتمسكي بحلمي وطموحي وهدفي اللي حطيته في اول السمستر, كان باقي على الفاينلات شهر تقريبا وكان روتيني كالتالي: اصحى, اكل, اخلص كلاسات, ارجع, اتغدى, انام ساعه, اصحى اتقهوى واشيل اغراضي واروح مبنى الاوريا (مبنى السنة التحضيريه) واذاكر الى الفجر وارجع الغرفه وكان هذا المنوال, طبعا كان نظامي اذاكر اكثر من ماده في يوم لان كان الماث دسم والكمستري ادسم, خلصت المواد هذي من الكتاب والنوتات في اسبوعين وشوي وكان باقي على الاختبارات اسبوع وشوي, فتحت اختبارات قديمه للمواد اللي عندي من 2013 الى 2008 تقريبا وكنت مستعد 100% لكل اختبار ممكن تحطه الاداره القبيحه, اتذكر كنت اذاكر مع صديقي عبدالعزيز (كل يوم اشوف وجهه بدون مبالغه واوعدكم اخصص له حلقه كامله هالادمي), دخلت اختبار الماث وكان اختيار من متعدد, واخذت فيه 135/140 !!!!!! كنت مبسسسسسسوط مرررره لاني اخذت اعلى قريد قال لياه المدرس مؤنس ووفيت بوعدي له, جا الاختبار اللي كان بعده بيوم (الكيمياء), وبدعت فيه واخذت اتذكر اذا ماكنت غلطان 35/40, واخذت اعلى قريد ممكن اخذه ولله الحمد والمنه, اما البتروليوم كان فاينل صعب جدا جدا جدا ولكن الافرج كان في صالحي كوني كنت مبدع في اعمال السنة وجبت اعلى قريد برضه, الحمد لله حمدا طيباً مباركاً كما يليق بجلال وجهه وعظيم سلطانه! والان تبقى شيء واحد, هل حققت الهدف او لا!
الحقيقة اني حققت الهدف وجبت معدل 3.6+ ولله الحمد والمنه!!
"إن الهرب من الموت موت، وطلب الموت حياة, وإن الخوف من التعب تعب، والإقدام على التعب راحة, وإن الحرية هي شجرة الخلد، وسقياها قطرات من الدم المسفوح, والإسارة هي شجرة الزقوم، وسقياها أنهر من دم المخاليف المخانيق" - الكواكبي.
الحمد لله على البلاغ والنجاح, انتهى السمستر بفرح ومعدل فوق المتوقع وارتفاع المعدل التراكمي ارتفاع شديد جدا, والشكر لله.
في هالسمستر (142) تعلمت اشياء كثيرة, اضفت الى مخزون المبادئ عندي اشياء جديدة اهمها:
1. اذا تبي تحقق شيء, لا تفاتح احد فيه الا بعد ماتنجز 70% منه.
2. اذا سمعت اي تعليق سلبي, 40% راح تتغير نظرتك عن هدفك حتى لو كنت متيقن من انه تعليق سلبي وانه لازم عليك تجاهله.
3. للأسف اغلب طلاب الجامعه يفتقدون لروح الاخوه والمساعده الا ماندر, لذلك اعتمد على نفسك ولا غير نفسك.
4. ابتعد كل البعد عن اللي يتشكى فوق اللزوم, خصوصا الدوافير لانهم يحومون التسبد اذا تشكو.
5. مافيه اي فرق في الامكانات بينك وبين اي طالب سوى الاجتهاد, اشتغل وبتحصل بأذن الله.
الى ان القاكم في 151, سمستر النكبه الحلوه ههههههههههههههههه, ليش سميته النكبه الحلوه؟ نشوف في الحلقة الجايه < كيفني وانا احمسكم ؟
. تعليق: اللي يقرأ مذكراتي ويتابعها بجديه يدخل على حسابي في الاسك ويكتبلي (متابع) واذا عنده اي تعليق او نصيحه بكون اكثر من سعيد.
ask.fm/eng3b
ودمتم سالمين.
ليست هناك تعليقات:
إرسال تعليق